11 qarasha kúni «NHK Music Special» japondyq telebaǵdarlamasynda «Autumn Strong» («Don’t Go») áigili kompozitsiiasynyń avtory Kodji Tamakige arnalǵan shyǵarylym ótti. Oǵan qazaqtandyq ánshi Dimash Qudaibergen de qatysty, dep habarlaidy QazAqparat dimashnews.com saityna silteme jasap.
«NHK Music Special» baǵdarlamasynyń bul kúngi shyǵarylymy rasymen de erekshe boldy. Sebebi qonaqqa Japoniianyń tanymal ánshisi Kodji Tamaki shaqyryldy. Mýzykant qoǵam arasyna kópten shyqpai, interviý de bermei kelgen. Japondyq kórermen bul shyǵarylymdy taǵatsyzdana tosty.
Baǵdarlamanyń arnaiy shaqyrylǵan qonaqtary Djeki Chýn men Dimash Qudaibergen boldy. Qos ánshi de Kodji Tamakidiń áigili «Autumn Strong» («Don’t Go») ánin qytai tilinde oryndaǵan.
Gonkongtyq ánshi Djeki Chýn atalmysh kompozitsiiany qytai tilinde alǵashqy bolyp shyrqady jáne qytailyq tyńdarman ony úlken qoshemetpen qabyldady.
Keiinnen Djeki Chýnniń oryndaýynan shabyt alǵan Dimash Qudaibergen bul ándi 2017 jyly Qytaida «I am Singer» baiqaýy kezinde oryndady. Sodan beri kompozitsiia tek Aziia elderinde ǵana emes, sondai-aq Reseide jáne Eýropa elderinde tanymal.
«Men Kodji Tamakidi ánshi retinde óte syilaimyn. «Don’t Go»-dy tyńdaǵan kezde japon júreginiń tereńdigi, Japoniianyń joǵary mádenietiniń bailyǵy seziledi. Kodji Tamakidiń shyǵarmashylyǵy eshqashan eskirmeidi jáne áli de jas oryndaýshylarǵa úlken áserin tigizip keledi. Biregei shyǵarmashylyǵyńyzdy budan ári de damytyp, tyńdarmandaryńyzdy qýanta beresiz degen úmittemin», - dedi Dimash Qudaibergen.
Óz kezeginde K.Tamaki qazaqstandyq ánshimen kezdeskenine qýanyshyn bildirdi.
«Dimashtan jyly lebiz estigenime qýanyshtymyn. «Don’t Go»-dyń túrli nusqasy bar. Jáne qai kezde bolmasyn, bul kompoziiany oryndaǵan ánshi, óz jasyna qaramastan, onyń tereńdigin jetkize bildi», - dedi japondyq ánshi.
Aita keteiik, «NHK Music Special» – ár ai saiyn belgili oryndaýshylar men mýzykanttar shaqyrylatyn tanymal baǵdarlama. Oǵan D.Qudaibergen qonaq retinde shaqyrylǵanyn buǵan deiin jazǵan bolatynbyz.
