Qazaqstandyq ánshi Dimash Qudaibergen BBC Kyrgyz saityna bergen suhbatynda búginde dúrkirep turǵan tanymaldylyǵyna qatysty pikir bildirdi. Aitýynsha, adamnyń kásibiliginen góri, igi qasietterin joǵary baǵalaidy. Osy oraida, óziniń de múmkindiginshe qarapaiym bolýǵa tyrysyp júrgenin jetkizdi, dep jazady Sputnik agenttigi.
"Omar Haiamnyń "Joly bolǵysh jáne bai adamdarǵa qyzǵanyshpen qaramańyzdar. Kún shyqqannan keiin árdaiym kún batady" degen sózi bar. Árbir jaqsy-jaman nárse — men úshin ómirimdegi sátterdiń biri. Men úshin adamnyń rýhani bailyǵy kásibi biliktiliginen artyq. Óitkeni bárimiz osy ómirde aldymen adam bolý úshin jaratyldyq. Ánshi bolý úshin emes, muǵalim bolý úshin emes. Sol sebepti, adami qasietterdi, rýhani qundylyqtardy baiyppen saqtap qalý — bizdiń eń basty paryzymyz dep oilaimyn", — deidi Dimash Qudaibergen.
Sondai-aq, ánshi qandai jaǵdai bolmasyn, ata-anasyna sóz tigenin qalamaitynyn jetkizdi. Iaǵni ózi arqyly ata-anasyn tek jaqsy jaǵynan tanytpaq niette. Budan ózge ol juldyz aýrýyna shaldyqsa da, árdaiym ózin sabyrǵa shaqyryp otyratynyn aitty.
"Árbir isim men jasaǵan áreketterim tikelei ata-anama kelip tiedi. Ata-anam "Dimashqa kezinde durys tárbie bermegen" degen sóz estimeýi úshin barynsha óz-ózimdi jerge túsirip júremin. Adamdar "Juldyz aýrýy bolady, ol basylady" dep jatady. Sózdiń shyny kerek, ol eshqashan basylmaidy. Bolyp jatqan jaǵdailarǵa kásibińizdiń bir bóligi retinde qarap, sabyrǵa kelseńiz, bári de durys bolady", — dedi ol.
Ári qarai Dimash Qudaibergen kóptegen tyńdarmanynyń ózin tym minsiz etip jibergenine toqtaldy. Aitýynsha, el qatarly ómir súrip, teris minez tanytatyn kezderi de bolady. Osy oraida ol barsha tyńdarmanyna alǵys bildirip, olardyń qoldaýynyń mańyzy zor ekenin aityp ótti.
"Sózdiń ashyǵyn aitsaq, meniń de ashýlanatyn, betke aityp qalatyn kezderim bolady. Kádimgidei men de tańerteń uiqydan turamyn, tamaǵymdy ishemin, baryp jatamyn jáne dostarymmen qaljyńdasamyn degendei", — dedi ánshi.
Sondai-aq, qazaqstandyq talant eshýaqytta ózin mega juldyz sanamaǵanyn jetkizdi.
