قازاقستاندىق ەنشٸ ديماش قۇدايبەرگەن BBC Kyrgyz سايتىنا بەرگەن سۇحباتىندا بٷگٸندە دٷركٸرەپ تۇرعان تانىمالدىلىعىنا قاتىستى پٸكٸر بٸلدٸردٸ. ايتۋىنشا, ادامنىڭ كەسٸبيلٸگٸنەن گٶرٸ, يگٸ قاسيەتتەرٸن جوعارى باعالايدى. وسى ورايدا, ٶزٸنٸڭ دە مٷمكٸندٸگٸنشە قاراپايىم بولۋعا تىرىسىپ جٷرگەنٸن جەتكٸزدٸ, دەپ جازادى Sputnik اگەنتتٸگٸ.
"ومار حايامنىڭ "جولى بولعىش جەنە باي ادامدارعا قىزعانىشپەن قاراماڭىزدار. كٷن شىققاننان كەيٸن ەردايىم كٷن باتادى" دەگەن سٶزٸ بار. ەربٸر جاقسى-جامان نەرسە — مەن ٷشٸن ٶمٸرٸمدەگٸ سەتتەردٸڭ بٸرٸ. مەن ٷشٸن ادامنىڭ رۋحاني بايلىعى كەسٸبي بٸلٸكتٸلٸگٸنەن ارتىق. ٶيتكەنٸ بەرٸمٸز وسى ٶمٸردە الدىمەن ادام بولۋ ٷشٸن جاراتىلدىق. ەنشٸ بولۋ ٷشٸن ەمەس, مۇعالٸم بولۋ ٷشٸن ەمەس. سول سەبەپتٸ, ادامي قاسيەتتەردٸ, رۋحاني قۇندىلىقتاردى بايىپپەن ساقتاپ قالۋ — بٸزدٸڭ ەڭ باستى پارىزىمىز دەپ ويلايمىن", — دەيدٸ ديماش قۇدايبەرگەن.
سونداي-اق, ەنشٸ قانداي جاعداي بولماسىن, اتا-اناسىنا سٶز تيگەنٸن قالامايتىنىن جەتكٸزدٸ. ياعني ٶزٸ ارقىلى اتا-اناسىن تەك جاقسى جاعىنان تانىتپاق نيەتتە. بۇدان ٶزگە ول جۇلدىز اۋرۋىنا شالدىقسا دا, ەردايىم ٶزٸن سابىرعا شاقىرىپ وتىراتىنىن ايتتى.
"ەربٸر ٸسٸم مەن جاساعان ەرەكەتتەرٸم تٸكەلەي اتا-اناما كەلٸپ تيەدٸ. اتا-انام "ديماشقا كەزٸندە دۇرىس تەربيە بەرمەگەن" دەگەن سٶز ەستٸمەۋٸ ٷشٸن بارىنشا ٶز-ٶزٸمدٸ جەرگە تٷسٸرٸپ جٷرەمٸن. ادامدار "جۇلدىز اۋرۋى بولادى, ول باسىلادى" دەپ جاتادى. سٶزدٸڭ شىنى كەرەك, ول ەشقاشان باسىلمايدى. بولىپ جاتقان جاعدايلارعا كەسٸبٸڭٸزدٸڭ بٸر بٶلٸگٸ رەتٸندە قاراپ, سابىرعا كەلسەڭٸز, بەرٸ دە دۇرىس بولادى", — دەدٸ ول.
ەرٸ قاراي ديماش قۇدايبەرگەن كٶپتەگەن تىڭدارمانىنىڭ ٶزٸن تىم مٸنسٸز ەتٸپ جٸبەرگەنٸنە توقتالدى. ايتۋىنشا, ەل قاتارلى ٶمٸر سٷرٸپ, تەرٸس مٸنەز تانىتاتىن كەزدەرٸ دە بولادى. وسى ورايدا ول بارشا تىڭدارمانىنا العىس بٸلدٸرٸپ, ولاردىڭ قولداۋىنىڭ ماڭىزى زور ەكەنٸن ايتىپ ٶتتٸ.
"سٶزدٸڭ اشىعىن ايتساق, مەنٸڭ دە اشۋلاناتىن, بەتكە ايتىپ قالاتىن كەزدەرٸم بولادى. كەدٸمگٸدەي مەن دە تاڭەرتەڭ ۇيقىدان تۇرامىن, تاماعىمدى ٸشەمٸن, بارىپ جاتامىن جەنە دوستارىممەن قالجىڭداسامىن دەگەندەي", — دەدٸ ەنشٸ.
سونداي-اق, قازاقستاندىق تالانت ەشۋاقىتتا ٶزٸن مەگا جۇلدىز ساناماعانىن جەتكٸزدٸ.
