Frantsiiadaǵy Kann kinofestivali aiasynda «Akademiia solistov» memlekettik kamerlik orkestriniń súiemeldeýimen óner kórsetken Qazaqstannyń halyq artisi Aiman Musaqojaeva men talantty ánshi Dimash Qudaibergen frantsýz halqyn erekshe yqylasqa bóledi. Bul týraly "Ult aqparat" MSM baspasóz qyzmetine silteme jasap habarlaidy.
Talantty ártister elimizdiń ókilderi retinde Astana men QazUÓÝ 20-jyldyq mereitoiy qarsańynda ótetin «Eýraziia» HKF tanytý maqsatynda óner kórsetti.
«Eýraziia» kinofestivali ̶ 1998 jyly negizi qalanyp, FIAPF (Halyqaralyq kinoprodiýserler qaýymdastyǵy federatsiiasy) akkreditatsiiadan ótken jáne bedeldi britandyq International FilmGuide basylymy álemniń 35 tanymal kinofestivalder qataryna engizilgen.
Halyqaralyq «Eýraziia» kinofestivaliniń Prezidenti Aiman Musaqojaeva Kanndaǵy Qazaq mádenieti keshinde bylai dedi:
«Eýraziia» kinofestivalinde otandyq filmderdi keńinen taratý, kinojobalar men qyzmetterdi usyný jáne kelissózder júrgizýge múmkindik beredi. Qazaqstan rejisserleri tek otandyq kinorynokty igerip qoimai, halyqaralyq kinojiyndarda da óz týyndylaryn batyl usynyp jatyr. Biyl Kann kinofestivaliniń «Erekshe kózqaras» baǵdarlamasynda Ádiljan Erjanov «Laskovoe bezrazlichie mira» filmimen qatysyp otyr. Al Jannat Alshanova «Konets sezona» filmimen Sinemafondason baǵdarlamasynda baq synap otyr. Film siýjetteri ár qily: elimizdiń tarihynan bastap búgingi problemalarǵa deiin qamtylǵan», - dedi Halyqaralyq «Eýraziia» kinofestivaliniń prezidenti Aiman Musaqojaeva Kanndaǵy Qazaq mádenieti keshinde.
71-shi Halyqaralyq aitýly kinofestivaldegi ulttyq pavilonnyń jumys isteýi elimizdiń kinoóndiretin el ekendigin dáleldep, halyqaralyq yntymaqtastyqty nyǵaitýǵa jáne otandyq kinoóndirýshilerdiń sheteldik kompaniialarmen jumys isteý múmkindikterin arttyrady jáne elimizdiń imidjin kóteredi.
Osy oraida aita ketelik, byltyr Ulttyq Pavilonda kórmege qoiylǵan rejisser Erlan Nurmuhambetovtyń «Barymta» jobasy búginde «Qazaqfilm» kinostýdiiasy men japoniialyq «Tokyo New Cinema» kinokompaniialarynyń qoldaýymen óndirilmek.
Sonymen qatar, Aiman Musaqojaeva Kann qalasynyń vitse-meri Frank Chikli myrzamen kezdesip, eki el arasyndaǵy mádeni, onyń ishinde kinematografiia men týrizm salasyn nyǵaitýdy kelisti.
«Búginde memleket tek áleýmettik mańyzdy jobalarǵa emes, sonymen qatar avtorlyq kinoǵa da qarjylyq qoldaý kórsetedi. Sonyń arqasynda qazaq kinosy qarqyndy damyp keledi. Máselen, otandyq «Qazaqfilm» kompaniiasy 20-dan astam filmdi jaryqqa shyǵarady, al jeke stýdiialar 30 film túsiredi. Qazirde otandyq kórermender qazaqstandyq kartinalardy kórýge yntaly. Elimizdegi kinoteatrlarda usynylǵan filmderdiń 15% otandyq filmder», - dedi QR Mádeniet jáne sport ministrliginiń ókili Almat Súiinov.
Kinonaryqta ashylǵan barlyǵy 230 pavilon bolsa, sonyń qatarynda turǵan otandyq pavilon óz týyndylaryn deńgeili usynyp otyr. Otandyq jańa filmderdiń prezentatsiiasynda treileri kórsetilgen Asanáli Áshimov basty róldi somdaityn, rejisser Qýat Ahmetovtyń «Arýaq» kartinasyna Kann kinofestivaliniń qonaqtary, qalanyń basshylyǵy jáne festivaldiń kinokomissiiasy erekshe qyzyǵýshylyq tanytty. Sondai-aq, kórmege Bolat Qalymbetovtyń «Talan», Ermek Tursynovtyń «Kinomehanik», Djef Vespanyń «Ámire» jáne basqa da filmder qoiylǵan.
Esterińizge sala keteiik, buǵan deiin Kann kinofestivaliniń «Erekshe kózqaras» baǵdarlamasynda elimizdiń kinematografisteri jeńimpaz atanǵan. 1998 jyly Dárejan Ómirbaev «Killer» filmimen jáne 2008 jyly Sergei Dvortsevoi «Tiýlpan» filmimen basty júldelerge ie bolǵan.
Elimizden barǵan delegatsiia qatarynda memlekettik uiymdardyń ókilderi, shyǵarmashylyq intellegentsiia, Qazaqstan kinosy men televiziiasynyń beldi azamattary jáne Qazaq ulttyq óner ýniversitetiniń stýdentteri bar.
