Qazaqstandyq ánshi Dimash Qudaibergen 10 jeltoqsanda Niý-Iorkte (AQSh) ótetin «Arnau tour ENVOY» jeke kontserti týraly aityp berdi, dep habarlaidy "Ult aqparat".
«Men álemge mádenietimizdi «Arnau tour ENVOY» shoýy arqyly pash etetinime qýanyshtymyn. Niý-Iorktegi kontserttiń kórermenderi zamanaýi naqyshtaǵy qazaqtyń saf ónerimen tanysa alady. Biz búkil komandamyzben osy baǵytta jumys istep jatyrmyz. Osy jobaǵa qatysy bar ár adam kásibi mamandar dei alamyn», - dedi óz áserimen bólisken Dimash.
«Arnau tour ENVOY» — álem nazaryn elimizge aýdaratyn úlken imidjdik joba. Kontsertke daiyndyq jumystarymen qazaqstandyq daryndy jastar ainalysyp jatyr. Shoý baǵdarlamaǵa qatysýshylardyń ortasha jasy – 25.
Shoý horeograftary Qýanysh Beken men Arsen Imenov. Ekeýi de óz isteriniń maitalmandary. Qýanysh Beken ISDS boiynsha «The Best Choreographer 2018» baiqaýynyń jeńimpazy atanǵan. Sondai-aq, ol kóptegen televiziialyq jobalarda, klip jáne estrada juldyzdarynyń úlken kontsertinde qoiýshy horeograf bolǵan. Arsen Imenov Contemporary art baǵytynda jumys isteidi. Túrli eýropalyq trýppalarda ózin synap kórgen. Jigitter Dimashtyń daýysy men mýzykalyq aspaptardyń únin dene qimyly arqyly úilestirýdiń túrli amalyn oilap tapty.
Kontserttegi barlyq horeografiialyq elementterdi 10 bishiden turatyn qazaqstandyq top oryndaidy. Olardyń qatarynda «Tantsy na TNT» shoýynyń finalisi Aleksandr Li de bar. Aleksandr «ARNAU» kontsertinde jeke kompozitsiia usynǵan bolatyn, endi osynyń jetildirilgen túrin Niý-Iork kórermenderi tamashalai alady.
DQ_band - kontsertke qatysatyn mýzykanttar mýlti aspapshylar bolyp tabylady. Ujymnyń ár múshesi birneshe aspapta erkin oinai alady.
Afishalardaǵy Dimashtyń jarqyn beinesin qazaqstandyq fotograf Evgeniia Volkova túsirgen. Posterdi Contemporary art jáne New Media Art janrlarynyń ókili Rinat Abdrahmanov daiyndady. Rinat vizýaldy áser berý arqyly shoý ideiasyn grafikalyq nusqada erekshe ázirlegen. «Arnau tour ENVOY» afishasynyń dizain avtory almatylyq jas dizainer Anastasiia Shipovalova.
Shoýdyń promo-roligin daryndy qoiýshy operator Azamat Dýlatov daiyndady. Azamattyń portfoliosynda qazaqstandyq jáne reseilik juldyzdardyń filmderi men klipteri bar. «Arnau tour ENVOY» úshin beineler Sharyn shatqalynda túsirildi. Qosymsha túsirilimder keibir horeografiialyq elementter bar pavilonda júrgizildi. Rolik negizi retinde qazaqtyń «Dúrdaraz» áni tańdaldy.
Dimash pen qoiylymnyń basqa da qatysýshylarynyń obrazyn otandyq stilist Ánel Nurasheva oilap tapty. Ol ártis pen shoý tujyrymdamasyn túisine bildi jáne barlyq baǵdarlamany túgeldei qabyldaýǵa múmkindik beretin durys obraz jasady. Bul jumysqa basqa da qazaqstandyq dizainerler atsalysqan.
Dimashtyń komandasymen birge Niý-Iorkke «Astana balet» teatrynyń ujymy da barady. Bul ujym músheleri 2013 jyldan bastap Qazaqstanda jáne odan tys jerlerde óner kórsetip, kórermenderdi tań qaldyrýda. Teatr repertýary – jarqyn jáne qaitalanbas týyndylardan turady. Munda klassikalyq jáne qazirgi zamanǵy stilder men ulttyq horeografiianyń sintezin baiqaýǵa bolady.
Ǵaryshtyq shoýdy qurýǵa atsalysyp jatqan mamandardyń jan-jaqtylyǵy – Dimashty bar qyrynan kórsetetindei. Shoýdyń uiymdastyrýshylary komandanyń kórermen tarapynan joǵary baǵa men qoshemetke ie bolaryna senimdi.
«Arnau tour ENVOY» tujyrymdamasynda 2019 jyldyń jazynda Nur-Sultan qalasynda ótken «ARNAU» kontserttik baǵdarlamasynyń úzdik sátteri toptastyrylǵan. Bul kontsert ártistiń týǵan jerine degen yqylasyn kórsetse, jańa shoý Dimashty qazaq mádenieti men álem mýzykasynyń elshisi retinde tanytady.
Jańa shoýdyń leitmotivi retinde ǵaryshtyq taqyryp – sheksiz keńistik tańdalǵan. Shoýda eski hittermen qosa, osy shoý úshin arnaiy daiyndalǵan jańa shyǵarmalar usynylady. Dimash qazaq, aǵylshyn, orys jáne qytai tilinde án salady.
Kontsertti QR Mádeniet jáne sport ministrligi AQSh-taǵy Qazaqstan Respýblikasynyń mádeni kúnderi aiasynda uiymdastyrmaq. Dimash 19 myń kórermenge arnalǵan «Barclays Center» arenasynda óner kórsetedi. Kontsert biletteri 13 qyrkúiekte satyla bastady.
