28 mamyr kúni Aqtóbe oblysynyń jurtshylyǵy úshin erekshe boldy. Sebebi, qalanyń mereili toiynyń bastalýy birneshe mádeni is-sharalarmen jalǵasty. Oblys ákimi Ońdasyn Orazalin shahardyń 150 jyldyǵyna orai jańadan boi kótergen Stirtbol ortalyǵynyń ashylýyna qatysty.
Sonymen qatar, jastar arasynda erekshe damyǵan kóshe sport túrlerinen uiymdastyrylǵan festivaldi tamashalady. Óńir basshysy qala turǵyndary men qonaqtaryn qutty mekenniń mereili toiymen quttyqtap, sport salasynyń damýyna úles qosqan birqatar úzdikterge merekelik medaldar tabys etti.
Sondai-aq, Ońdasyn Orazalin qala turǵyndarymen birge Tuńǵysh Prezident atyndaǵy saiabaqta uiymdastyrylǵan merekelik keshtiń kýási boldy. Aimaq basshysy aqtóbelik jurtshylyqty aitýly merekemen quttyqtady.
"Qalanyń irgetasy 1869 jyly aq tóbeniń basyndaǵy bekinistiń negizinde qalanǵan bolatyn. Biyl súiikti qalamyzǵa 150 jyl tolyp otyr. Aqtóbe qalasynyń áleýmettik-ekonomikalyq jaǵynan ósip-órkendeýine qosqan qomaqty úlesterińizge, eren eńbekterińizge, azamattyq qoǵam qurýǵa belsene qatysqandaryńyzǵa, beibitshilik pen kelisimdi saqtaýǵa at salysqandaryńyzǵa alǵysymdy bildiremin", - dedi Ońdasyn Orazalin.
Sonymen qatar, aimaqqa esimi belgili, eńbekterimen kózge túsken túrli saladaǵy 6 azamatqa merekelik tós belgi taqty. Osy mereitoida aqtóbelikter taǵy bir qýanyshty oqiǵanyń kýási boldy. Aqtóbe turǵyndary úshin tosyn syi retinde esimi álemge tanylǵan jerlesteri, ánshi Dimash Qudaibergenov te keshke arnaiy qatysty. Oblys ákimi Dimash Qudaibergenovti de "Aqtóbeniń 150 jyldyǵy" merekelik medalimen marapattady. Tanymal juldyz oblys ákimine sheksiz razylyǵyn bildirip, kórsetilgen erekshe qurmetterine rahmetin aitty. Merekelik kesh otshashýmen aiaqtaldy.
