Qazaqstandyq ánshi Dimash Qudaibergenov «I am a singer» baiqaýynyń úshinshi kezeńinde úshinshi oryn ielendi, dep habarlaidy Ult.kz QazAqparat HAA-nyń Qytaidaǵy menshikti tilshisine silteme jasap.
«Efirden buryn habarlaimyz, Tan Tszin «Yntyzarlyq» ánin túpnusqadan da myqty oryndap, birinshi oryn aldy. Ol osylaisha kópshiliktiń qoldaýyna ie bolyp kele jatqan Dimashtan da basym tústi», dep habarlaidy portal.
Al Chjao Lei «Chendý» atty halyq ánin oryndap, ekinshi orynǵa taban tiredi. Al Dimash - úshinshi jáne Chjan Tsze - tórtinshi tur.
Dimash Qudaibergenov Queen tobynyń «Show must go on» ánin oryndady. Basqa da baiqaý qatysýshylar sekildi Dimash ta sahnaǵa gitarashylarmen birge shyqty.
«I am a singer» baiqaýynyń úshinshi kezeńiniń túsirilimi 21 qańtar kúni ótken. Biraq ol efirge 4 aqpan kúni keshke shyǵady.
«Weibo» áleýmettik jelisindegi Dimashtyń jumys tobynda 3-kezeńniń sýretteri jariialandy. Onda jerlesimizdiń stilisti BG Fashion, vizajist ári shashtarazy - DO Fashion, bet-beinesin jasaýshy - LANVIN 16AW ekendigi aitylǵan.
