Qazaq ulttyq óner ýniversitetiniń rektory Aiman Musaqojaevanyń aitýynsha, ánshi Dimash Qudaibergen Qytaidaǵy xalyqaralyq konkýrstan keiin «Evrovideniege» qatysady. Sodan keiin Amerikadaǵy án baiqaýynda óz baǵyn synap kórmek, dep habarlaidy QazAqparat agenttigi.
«Bizdiń ekinshi kýrs stýdentimiz - Dimash Qudaibergenniń Qytaida el namysyn qorǵap júrgenin bárimiz jaqsy bilemiz. Buǵan deiin ol «Jas qanatta», odan keiin «Slavian bazarynda» jeńimpaz atanǵan. Qazir Qytaidaǵy xalyqaralyq baiqaýǵa qatysyp jatyr. Endi, biz ony «Evrovideniege» daiyndap jatyrmyz. Sosyn ol «Amerika daýysyna» qatysady. Búgin ol Los-Andjeles qalasyndaǵy miýzikl-shoýǵa shaqyrý aldy», - dedi Musaqojaeva búgin Astanada ótken jiynda.
Aita keteiik, qazaqstandyq ánshi Dimash Qudaibergen Qytaidaǵy «I am singer» atty xalyqaralyq baiqaýǵa qatysyp jatyr. Birinshi kezeńde ol frantsýz tilindegi ándi oryndap, qytailyq tyńdarmandy tańqaldyrdy. Sońǵy synda úshinshi orynnan kórinse de, jalpy upai sany jaǵynan birinshi bolyp keledi. Dimash kelesi ánin qytai tilinde oryndaitynyn málimdegen.
