24-shi «China Top music Awards» sharasynda qazaqstandyq ánshi Dimash Qudaibergen «Aziianyń eń tanymal ánshisi» (Best Asia popularsinger) ataǵyn jeńip aldy, dep habarlaidy "Ult aqparat".
"Aziialyq Gremmi" atalyp ketken syilyqty tabystaý sharasy Shanhai qalasynda ornalasqan Mercedes Benz Arena-synda ótti.
Marapattaý rásiminde Dimash óziniń álemge tanymal bolýyna sebepker bolǵan SOS d'un terrien en détresse ánin oryndady. Bul ándi qazaqstandyq ánshi "I am a Singer" baiqaýynyń birinshi kezeńinde oryndaǵan bolatyn.
Marapattaý kezinde Dimash Qudaibergen kórermenderge qazaq tilinde alǵys aitty. «Assalaýmaǵaleikúm, qurmetti áleýmet! Óte qatty qýanyshtymyn. Bul meniń shet eldegi eń alǵashqy úlken syilyǵym. Eń aldymen, ózimniń ata-anama jáne de jan dosyma kóp raqmet aitamyn, meni qoldap-demeý bolyp júrgenderi úshin. Sonymen qatar, meniń baǵymdy ashyp, álemge tanytyp jatqan «Singer» jobasyna alǵys aitamyn! Meniń qoldap júretin barsha tyńdarmandaryma raqmet aitqym keledi! Bar bolyńyzdar, aman bolyńyzdar! Bul tek bastamasy ǵana», - dedi ol.
«China Top music Awards» - 1994 jyldan beri Aziia elderindegi eń tanymal ánshilerdiń basyn qosatyn úlken merekelik shara. Bul kúnde ol Qytai mýzykalyq qoǵamdastyǵyndaǵy eń aitýly oqiǵalardyń biri sanalady.
Esterińizge sala keteiik, buǵan deiin Dimash sharanyń qyzyl kileminen ótip, jankúierleriniń ystyq yqylasyna bólengeni týraly habarlaǵan bolatynbyz.
Otandasymyz qatysyp jatqan jobasynyń 10-týrynda "Umytylmas kún" atty ándi qazaq jáne qytai tilderinde oryndap, baiqaýdyń finalyna shyqqan-tyn.
