AQSh prezidenti Djo Baiden men vitse-prezident Kamala Harristyń inaýgýratsiiasyna arnalǵan aptalyqtyń ashylý saltanatynda Dimash Qudaibergen aitqan taǵy bir ánniń videosy jariialandy, dep habarlaidy Sputnik Qazaqstan.
Qazaqstandyq ánshi aldymen aǵylshyn tilinde AQSh-tyń jańa prezidenti men vitse-prezidentin quttyqtady. Odan keiin óz sózin qazaq tilinde jalǵastyrdy.
"Qurmetti prezident myrza! Sizdi shyn júrekten quttyqtaǵym keledi. Álemde tek birlik bolsyn! Álemde beibitshilik bolsyn, barlyq álem halyqtary aman bolsyn!", - dedi Qudaibergen.
Osydan keiin Dimash Qudaibergen "SOS d'un terrien en détresse" ánin oryndap berdi.
Týra tórt jyl buryn 2017 jyly 21 qańtarda Dimash osy ándi Qytaidyń "I am singer" baiqaýynda aityp, keńinen tanyldy. Sodan beri kóptegen marapattarǵa ie boldy. Álemniń tanymal ánshilerin óziniń erekshe daýysymen tánti etti.
Aita keteiik, buǵan deiin jariialanǵan videoda Dimash Qudaibergen halyq áni "Samaltaýdy" oryndaidy. Ol da AQSh prezidentiniń inaýgýratsiiasy arnalǵan merekelik aptalyqtyń ashylý saltantynda túsirilgen.
Saltanatty sharany Halyqaralyq baýyrlas qalalar qaýymdastyǵy (Sister Cities International nemese SCI) uiymdastyrdy. Merekelik shara koronavirýs pandemiiasyna bailanysty onlain ótti.
Spikerler men qonaqtar arasynda gýbernator Bill Anoabýtti, general-maior Armando Kabada, kongressvýmen Eleonora Holms Norton, maior Tim Keller, senator Bob Menendez, AQSh teńiz jaiaý áskeri orkestri jáne taǵy basqalary boldy.
