Dimash Qudaibergen Qazaqstannyń Niý-Iorktegi BUU janyndaǵy Turaqty ókildigine bardy, dep habarlaidy "Ult aqparat" SIM baspasóz qyzmetine silteme jasap.
Jariialanǵan aqparatta Dimash Qudaibergenniń Qazaqstannyń Niý-Iorktegi Birikken Ulttar Uiymy janyndaǵy Turaqty ókildigine baryp, qazaqstandyq diplomattarmen jáne olardyń otbasylarymen kezdeskeni jazylǵan.
«Tanymal qazaqstandyq ánshi BUU shtab-páterinde de bolyp, alǵan áserlerimen BUU Jańalyqtar qyzmetine bergen suhbatynda bólisti», - dep atap ótedi vedomstvodan.
«Dál qazirgi sezimimdi sózben jetkizý múmkin emes. Óitkeni búgin taǵdyrdyń arqasynda mańyzdy kabinetterde bolyp, munyń barlyǵyn óz kózimmen kórý baqyty buiyrdy jáne dúniejúzi adamdary osy jerde bas qosyp, mańyzdy túitkildi álemdik máselelerdi sheshedi. Bári kóz aldymda oryn aldy. Bilmeimin, áiteýir tańǵajaiyp sezimdi bastan keshirdim. Olardyń qasyna baryp: «Barlyq máselelerdi búkil álemde soǵys bolmaityndai, búkili baqyty ári dostyqta ómir súretindei etip sheshýlerińizdi ótinemin» dep aitqym keldi», - dedi Dimash elimizdiń Syrtqy ister ministrligi taratqan videoda.
Esterińizge sala ketsek, kúni keshe ǵana Brýklindaǵy (Niý-Iork) Barclays Center sahnasynda Igor Krýtoidyń «65-ke ómirde, bir-aq ret tolamyz» atty keshi ótken bolatyn. Kontsertke Dimash Qudaibergen qurmetti qonaq retinde qatysyp, birneshe án oryndady.
Aita keterligi, dál osy Brýklindaǵy Barclays Center sahnasynda Dimash ta kontsert beredi. Elimizdiń Mádeniet jáne sport ministrliginiń uiytqy bolýymen ótetin mádeni keshte ánshi 4 tilde án salady.
