Qazaqstandyq ánshi Dimash Qudaibergen barlyq ýaqyttaǵy úzdik ánshi ataǵy úshin daýys berý aiaqtalǵannan keiin óz jankúierlerine úndeý jasady, dep jazady "Ult aqparat" Sputnik agenttigine silteme jasap.
Esterińizge sala keteiik, amerikalyq Ranker portaly úzdik ánshi ataǵy úshin onlain daýys berý ótkizdi. Daýys berý barysynda Dimash Qudaibergen reitingte kóterilip, daýys berýdiń sońǵy kezeńinde 6-shy oryndy ielendi. Degenmen, qorytyndy reitingte ol 369-shy orynǵa deiin tómen syrǵydy, bul onyń jankúierleriniń ashýyn keltirip, saýalnamany uiymdastyrýshylardyń adaldyǵyna kúmándanýǵa májbúrledi.
"Qymbatty dostar! Men búgin qandai da bir amerikalyq saitta saýalnama júrgizilip, ol jerde meniń de atym atalǵanyn bildim. Daýys berip, qoldaǵandaryńyz úshin shyn júrekten alǵys aitqym keledi, alaida bul daýys berýdiń qandai da bir konkýrsqa, marapatqa nemese televiziialyq jobaǵa qatysy joq. Bul jai ǵana internet-saýalnama, ol eshteńeni sheshpeidi. Maǵan jáne meniń Qazaq halqyma súiinpenshilik bildirip júrgenderińiz úshin kóp rahmet. Meniń shyǵarmashylyǵymnyń osyndai adal jankúierleriniń bolýy – úlken abyroi. Men sizderdiń jankúierińizbin. Welcome to Kazakhstan! Sizderdi jaqsy kóremin!" – dep jazdy Dimash Instagram-daǵy paraqshasynda.
Reitingtiń úzdik úshtigine Freddi Merkiýri (1), Maikl Djekson (2) jáne Ýitni Hiýston (3) endi.
Qazaqstandyq ánshi Dimash Qudaibergen I am singer konkýrsynan keiin álemge tanymal boldy. Ártis ótken jyldyń qarasha aiynda Londonda jeke kontsertin berdi, al 2019 jyly 22 naýryzda Máskeýdegi Kreml saraiynda óner kórsetedi.
