Dimash Qudaibergen jankúierlerin taǵy bir jetistigimen qýantty. Ol keshe «Aziiadaǵy eń kelbetti adam – 2019» reitingisinde 8-oryn aldy, dep habarlaidy "Ult aqparat" Facebooktegi TC Candler paraqshasyna silteme jasap.
Biyl tamyz aiynyń sońynda táýelsiz sarapshylar TC Candler halyqaralyq konkýrsynda qazaqstandyq Dimash Qudaibergendi «Aziiadaǵy eń kelbetti adam» atalymyna usyndy.
TC Candler Aziianyń eń tartymdy, eń kelbetti 100 tulǵasy engen jyl saiynǵy tizimin jariialady. Qazaqstandyq ánshi Dimash bul retingte segizinshi orynǵa taban tiredi.
Paraqshada jas ánshiniń bet-beinesi tartymdy, ári daýysy keremet ekeni jazylǵan.
«Álemniń barlyq turǵyny, ulttar men ulystar ony erekshe jaqsy kóredi» dep jazǵan TC Candler.
Dimash Qudaibergen ótken jyly jer betindegi eń symbatty 10 er adamnyń qataryna kirgenin aita ketý kerek. Ol joly Dimashty qoldaý úshin ol týraly jazbaǵa lúpil basyp, fotosýretiniń astyna pikir jazý kerek bolǵan.
Jankúierler qoiylǵan talapty buljytpai oryndap, nátijesinde Dimash úzdikterdiń qataryna endi. Al onyń keibir jankúieri qazaqstandyq ánshi birinshi orynda bolýy kerek dep sanaidy.
Olar ánshi týraly «Dimash Jer planetasyndaǵy eń kelbetti jigit», «Basqa qatysýshylardyń bet-júzi árlengen, al Dimash boiaýsyz-aq symbatty. Ol birinshi orynǵa laiyq» degen syndy pikirler jazǵan.
