Dimash Qudaibergenniń ákesi Qanat Aitbaev ulynyń Amerikadaǵy áigili «The World's Vest» baiqaýyna qalai shaqyrylǵanyn aityp berdi, dep habarlaidy QazAqparat tilshisi.
«Amerikada osy shoýdy uiymdastyryp otyrǵan telearna jer-jerdegi talantty adamdarǵa usynystar jasaǵan. Shoýǵa qatysý týraly hatty biz byltyr alǵan bolatynbyz. Oilana kele, Amerikanyń qurlyǵyna da Dimash óziniń ónerin tanytsam degen oimen shaqyrýdy qabyl aldy. Sondyqtan, ol jerdegi maqsat - qalai bolǵanda da qazaqtyń balasy eldiń atynan shyǵyp, eliniń, óziniń ánin tanytsa degen oi», - dedi Qanat Aitbaev «Qazaqstan» arnasyndaǵy «Túngi stýdiia» baǵdarlamasynda.
Ánshiniń ákesi sonymen birge Mihail Gýtsireevtiń sózine jazylǵan «Liýbov ýstavshih lebedei» ánine túsirilip jatqan klip týraly sóz qozǵady.
«Igor Krýtoiǵa da, bizge de rejisserdiń oiy unady. Ispaniianyń tańdalý sebebi - qazirgi ýaqytta ol jaqta 20 gradýs jyly. Klip Malaga qalasynda túsirildi. Sol jerde jer betinen bólek, tylsym Marsqa uqsaityn aýmaq bar eken. Aýa raiy men tabiǵaty da ertegige sáikes keletindei dúnie bolsyn dep, sol jerdi rejisser arnaiy tańdap alypty», - deidi Qanat Aitbaev.
Ánshiniń ákesi Ispaniiadan kelgennen keiin jolai Ýkrainada taǵy bir klip túsirilgenin atap ótti. Sonymen qatar, osy klipterdiń tusaýkeseri qaida ótetini de aityldy.
«Túsirilgen kliptiń bári de sórede jatpaidy. Qyzyǵýshylyq tanytqan Qazaqstannyń da, Reseidiń de telearnalaryna beremiz. Sol sekildi klipter Iýtýb arnada da júkteledi. Amandyq bolsa, kliptiń shyǵatyn ýaqyty jaqyndaǵan kezde tizerlerin jariialaityn bolamyz», - dedi Qanat Aitbaev.
Eske sala ketsek, Amerikanyń The World's Vest baiqaýynda Qazaqstannyń atynan óner kórsetip jatqan Dimash Qudaibergen men Daneliia Tóleshova jaqynda taǵy da amerikalyqtardy tańǵaldyrǵan bolatyn.
Odan bólek ánshi 8 naýryzǵa tosyn syi daiyndap jatqanyn jariia etip, «Aqqýym» ánine jazylǵan klipiniń tizerimen tanystyrǵan edi.
