Ulybritaniia astanasy Londonda Dimash Qudaibergenniń «DQ» kontserttik shoýy dúrkirep ótti, dep habarlaidy "Ult aqparat".
3000 adamdy syidyra alatyn «Indigo at the O2» kesheninde ótken kontserttiń biletteri aldyn-ala internet arqyly satylyp qoiǵan. Tipti, bilet satatyn internet saity Dimashtyń kotsertiniń biletin saýdaǵa shyǵarǵan kúni qaraýshy adamdardyń sanynnyń kóptiginen isten shyqqan-tyn.
Aitýly sharany QR Mádeniet jáne sport ministrligi uiymdastyrdy. Vedomstvonyń baspasóz hatshysy Aidar Qyryqbai feisbýk jelisinde kontsertten video úzindilermen bólisti. Shaǵyn úzindilerde Dimashtyń Qurmanǵazy kúii «Adaidy» sheber oryndaǵanyn, óz repertýaryndaǵy áigili frantsýz áni «S.O.S» ánin shyrqaǵanyn kórýge bolady.
Aita keterligi, dál osy «S.O.S» áni oryndalǵan kezde sahnanyń alyp ekranynan mánerlep syrǵanaýshy, marqum Denis Tenniń muz aidynynda óner kórsetken videosy kórsetilgen.
Taǵy bir videoúzindide Dimash oryndaǵan «Daididaý» ánin Londondaǵy kórermenderdiń úlken shoǵyry birge aityp turǵanyn kórýge bolady.
«Indigo at the O2» zaly bul kúni kórermenge lyq toldy. Qazaqstan, Chehiia, Belgiia, Ulybritaniia, Qytai, Kanada, Germaniia, Resei, Finliandiia, Chehiia sekildi álemniń 45 elinen kelgen ánshiniń jankúierleri kontsert bastalmai turyp-aq «Dimash» dep daýystap, shoýdyń bastalýyn asyǵa kútti. Eki saǵatqa sozylǵan kontsert kópshilik kútkennen artyq deńgeide ótkeni anyq. Ánshi sahnadaǵy árbir nómirinde ártúrli kiimmen shyǵyp, tek jandy daýysta án shyrqady.
Respýblikalyq "Aiqyn" gazetiniń jazýynsha, keshke arnaiy kelgen Qazaqstan Respýblikasy Mádeniet jáne sport vitse-ministri Aqtoty Raiymqulova Elbasynyń «Rýhani jańǵyrý» baǵdarlamasy aiasynda qazaq eliniń mádenietin nasihattaý maqsatynda uiymdastyrylǵan kontsertke joǵary baǵa berdi.
– Bul kommertsiialyq joba emes. Kontsertten túsken qarjy ónerde júrgen qazaqstandyq jas talanttardyń qabiletin ashýǵa, ónerin shyńdaýǵa jumsalady, – deidi vitse-ministr.
Kontserttiń uiymdastyrylýy men ótýin bastan-aiaq qadaǵalap Dimashtyń ata-anasy da júrdi. Qanat Aitbaev ulynyń jaqsy kóńil-kúide júrgenin jetkizip, aldaǵy josparlarymen bólisken.
– Bul kontsert Ulybritaniiadaǵy Qazaqstan mádeniet kúnderi aiasynda ótti. Negizgi maqsatymyz qazaqtyń ánin, qazaqtyń ónerin jer jahanǵa tanytyp, mádenietimizdiń kókjiegin keńeitý. Aldaǵy josparlarymyzda Kanadada, Reseide, ońtústik Aziia elderinde de kontsertter ótkizý oilastyrylǵan. Qaida júrsek te, qai eldiń sahnasyna shyqsaq ta qazaq ánin oryndaý negizgi ustanymymyz bolyp qala beredi, – deidi ánshiniń ákesi.
Kontsert eki jarym saǵatqa sozylǵan. Dimash ánin oryndap, qoshtasyp ketkennen keiin de qalyń tyńdarman sahnanyń aldyn bosatpai, jarty saǵatqa jýyq ýaqyt Dimashtyń esimin atap turyp alǵan.
Talantty ánshi sahna syrtynda jýrnalistermen júzdesip, áserimen bólisip te úlgergen.
– Mynadai kórermenniń aldynda, ónerdi tereń baǵalai bilgen buqara aldynda qazaq ánderin oryndap, bir armanyma jettim dep esepteimin. Óte qýanyshtymyn. Alǵan áserimdi áli tolyq sezinip bite alar emespin, – deidi Dimash.
Eske sala ketsek, osydan tórt kún buryn Dimash Qudaibergen QR Mádeniet jáne sport ministri Arystanbek Muhamediulymen kezdesýinde Londonda oryndalatyn ánderdiń 60 paiyzy qazaq tilinde bolatynyn aitqan edi.
Odan bólek, ánshini Britan astanasyndaǵy áýejaida álemniń túkpir-túkpirinen kelgen jankúierleri qalai kútip alǵanyn habarlaǵan bolatynbyz.
sýretter vkontakte áleýemettik
