«Dikii Arman» 24 adamdy «Ritz Carlton» men «Qazaqstan» qonaq úileriniń parkingterinde ustaǵan. Bul týraly QR Bas prokýratýrasy 1-qyzmet bastyǵy Cerik Shalabaev aitty, dep habarlaidy QazAqparat.
Ortalyq kommýnikatsiialar qyzmetindegi brifing barysynda ol qylmystyq ortadaǵy tulǵalardyń qańtar oqiǵasyna belsene qatysqany belgili ekendigin aitty.
«Qylmystyq ortada keńinen tanymal «Dikii Arman» laqap atty Jumakeldiev pen onyń sybailastarynyń róli erekshe. Atap aitqanda, 6 qańtarda onyń qylmystyq tobyna qatysýshylardyń birimen Almaty qalasyndaǵy «Qazaqstan» qonaqúiine kelgen qylmyskerlerge «Glock» jáne «Makarov» markaly tapanshalar taratyldy. Osy ýaqytta qarýlanǵan qylmyskerler uiymdastyrýshy men onyń qaramaǵyndaǵy adamdardan tiisti nusqaýlar aldy. Olar seriktesterin 10 adamnan turatyn toptarǵa bólip, josparlanǵan qylmystaryndaǵy rólderin anyqtady. Ishterinen «basshylary» taǵaiyndalyp, olarǵa bronejiletter, bastaryna arnalǵan qorǵanys quraldary, atys qarýy jáne 200 myń teńge aqsha berildi», - dedi ol.
1-qyzmet bastyǵynyń atap ótýinshe, onyń qatardaǵy seriktesterine sýyq qarýlarymen, dýbinka jáne denege ziian keltirýge bolatyn basqa zattarmen qarýlaný tapsyrylǵan. Erekshe belgi retinde barlyq qatysýshylardyń syrt kiiminiń jeńine aq mata taqqan.
«Atalǵan qarýly qylmyskerler toptary qalanyń ártúrli núktelerinen 24 azamatty urlap, olardy uryp-soǵyp, «Ritz Carlton» jáne «Qazaqstan» qonaqúileriniń parkingterinde ustaǵan. Keiinnen, jábirlenýshiler qala shetine jetkizilip, qylmyskerlerdiń qarýly kúzeti qoiyla otyryp, metall konteinerge ornalastyryldy. Dene jaraqatyn keltirý nátijesinde jábirlenýshilerdiń biri qaitys boldy. Kórsetilgen qylmystardy jasaǵany úshin 40 kúdikti tulǵa qamaýǵa alyndy. Qalǵan qylmystyq top qatysýshylaryn anyqtaý boiynsha jumystar jalǵasýda», - dedi Serik Shalabaev.
