Astanada ótip jatqan «Digital Bridge» halyqaralyq innovatsiialyq forýmynda sheteldik sarapshylar Qazaqstanda kásipkerlikti júrgizýge qatysty pikir bildirdi, dep habarlaidy QazAqparat.
«Birneshe jyl buryn Qazaqstanǵa saparmen kelgen bolatynmyn. Sol kezde kóptegen kásipkerlermen kezdesip, óte utymdy birqatar ideiamen tanystym. Osy jolǵy saparymda Qazaqstandaǵy kásipkerliktiń ainalasynda ekojúieni qurýdy jalǵastyrý úshin kelip otyrmyn. Sońǵy 6 jyl boiy álem elderine saiahattap, kásipkerlerge dáris oqyp, olardyń jahandyq jelisin damytýǵa úles qosýdamyn. Búginde Qazaqstanda kásipkerlerge jańa baǵyttardy ashýda múmkindikter mol ekenin baiqap otyrmyn. Atap aitqanda, osy eldi damytý jolynda biznes ókilderiniń alatyn orny erekshe. Qazaqstanda birneshe jas kásipkerlermen pikir almastym. Olardyń barlyǵy Qazaqstan bolashaǵyna ózderiniń úlesterin qosýǵa daiyn ekenin senimdi túrde aityp otyr», - dep toqtaldy Priceline Group negizin qalaýshy Djeff Hoffman.
Onyń paiymynsha, kásipkerlikke kiriserdiń aldynda túrli saladaǵy problemalardy sheshýge mán berý kerek.
«Kásipkerlik - ol jumys nemese kásip emes. Adamdardyń «men kásipker bolǵym keledi» dep aitqany maǵan unamaidy. Bul turǵyda adamdardan «men bul maqsat pen mindetterdi, problemalardy sheshkim keledi» degendi estigim keledi. Adamdardyń kóbisi tek shaǵymdanǵannan basqa eshteńe istemeidi, al kásipker problemany sheshýge umtylady», - dedi D. Hoffman.
Óz kezeginde Unbound bas direktory Deniel Siel Qazaqstanda biznes jobany iske qosýdyń áleýeti joǵary ekenin sóz etti. Eger jobany júzege asyrý durys bastalsa, ony TMD aýmaǵynda taratýǵa ekpin quiý qajet.
«Astana Hub boiynsha aitatyn bolsaq, Bahrein men Singapýr úlgisi turǵysynda sýbsidiialar men granttar kerek. Bul rette Úkimetpen únemi dialog júrgizip turý qajet, iaǵni bul turǵyda memleket serpin berip otyrady. Ideialar jeke sektordan tússe, memleket tarapynan qoldaý bolýy shart. Osy oraida, memlekettik-jekeshelik áriptestik eń qolaily qadam. Máselen, Singapýr úlgisindegi memlekettik-jekeshelik áriptestik táýekelderdi, bastamalardy jáne ideialardy teńgerimdeýge bolatynyn kórsetip otyr. Atap aitqanda, Qazaqstan Jibek jolynyń murageri ekeni belgili. Osy oraida Qazaqstan Eýropa men Aziia arasyndaǵy tsifrlyq kópirdi qurýǵa umtylyp jatyr. Negizi, bul bastamada investorlardy tartýǵa múmkindigi joǵary, keiinnen osy investitsiialar mindetti túrde qaityp oralady», - dedi Deniel Siel.
Budan buryn habarlanǵandai, elordada Digital Bridge halyqaralyq innovatsiialyq forýmy ótip jatyr.
Forým aiasynda Hyperloop Transportation bas direktory Dirk Alborn Qazaqstanda sońǵy býyndy tehnologiialarǵa negizdelgen fýtýristik poiyz jobasyn iske asyrýǵa nietti ekenin atap ótti.
