GETTY IMAGES
Eýroodaq 30 myń ýkrain áskerin jattyqtyrady. Olar Batys elderiniń Ýkrainaǵa bergen áskeri tehnikasyn qoldanýdy meńgeredi. Bul týraly Deutsche Welle habarlady.
Buǵan qosa, Eýroodaq Ýkrainaǵa minadan tazalaý jumystaryn júrgizý úshin 25 mln eýro qarajat bólmek. Bul boiynsha resmi málimdeme 3 aqpanda Kievtegi "EO – Ýkraina" sammitinde jariialanady dep aitylady.
Eýrokomissiia jetekshisi Ýrsýla fon der Liaien sammit bastalmai turyp, 2 aqpanda ýkrain úkimeti múshelerimen kezdesedi. Olar Ýkrainany Eýroodaqqa jedel qosý múmkindikteri jáne Resei biligin áskeri basqynshylyǵy úshin jaýapqa tartatyn Eýropa tribýnalyn qurý máselesin talqylaidy.
Byltyr qarashada Eýropa elderi ýkrain áskerin jattyqtyrý missiiasyn (EUMAM) qurǵan. Sol kezde Ýkraina qarýly kúshteriniń 15 myń sarbazy jattyǵýdan ótetini aitylǵan. Alaida qazir bul kórsetkish eki ese ulǵaidy.
Áskeri qyzmetkerler Eýropada shyǵarylǵan quryshty tehnikalardy (arasynda Leopard-2 tankileri de bar) qoldanýdy meńgeredi.
Qańtardyń aiaǵynda Eýroodaq ýkrain áskerin daiyndyqtan ótkizýge 45 mln eýro bólgen.
Aita keteiik, Ýkraina qarýly kúshteriniń jaýyngerleri qazir túrli elde áskeri daiyndyqtan ótip jatyr. Ulybritaniiada olar Challenger-2 tankilerin, Germaniiada Marder tehnikasyn aidaýdy úirenip júr. AQSh-ta da Abrams jáne Patriot zenit zymyrany keshenin paidalanýdy meńgerip jatqan ýkrain áskeri bar. Sondai-aq olar Chehiiada, Polshada jáne Baltyq elderinde jattyǵyp jatyr.
Conflict Intelligence Team sarapshylarynyń sózine qaraǵanda, tank ekipajyn daiyndaýǵa úsh ai jáne odan da kóp ýaqyt ketýi múmkin. Buǵan qosa, tehnika, onyń qosalqy bólshekteri men jabdyqtaryn jóndeitin mamandardy da daiyndaý kerek.
