Senatorlar keibir ekinshi deńgeidegi bankter júrgizip otyrǵan saiasatqa jáne jeke sot oryndaýshylarynyń jumysyna narazy, dep habarlaidy QazAqparat.
Osyǵan orai búgin Senattyń jalpy otyrysynda depýtattar Asqar Shákirov, Vladimir Volkov jáne Lázzat Súleimen elimizdiń Premer-Ministriniń atyna depýtattyq saýal joldady.
Bul depýtattyq saýaldy daiyndaýǵa janjal sońy adam ólimine ákep soqqan Almaty qalasyndaǵy turǵyn úidi bosatýdy talap etý barysyndaǵy qaiǵyly oqiǵa sebep bolǵan.
Depýtattardyń aqparatyna sáikes, júrgizilgen taldaý, kepildik múlikpen saýda-sattyq sybailas jemqorlyq kórinisteri úshin jaily orta bolyp tabylatynyn kórsetken. Bul bankter men jeke sot oryndaýshylaryna boryshkerlerdiń jyljymaityn múlkin tómen baǵamen, keide shekteýsiz mólsherde satyp alýǵa múmkindik beredi. Bir adam birneshe páterdi satyp alǵan faktiler de tirkelgen. Sonymen qatar, barlyq saýda-sattyqqa qatysýshylar bir-birimen bailanysty bolǵan faktiler de az bolmaǵan.
«2021 jyldyń 1 shildesinen 30 qyrkúiegine deiin respýblikanyń ákimshilik sottaryna 7 myńnan astam is qozǵalyp, onyń ishinde jeke sot oryndaýshylarynyń áreketterine shaǵymdaný boiynsha 2 338 talap- aryz túsken. Azamattardyń shaǵymdary negizinen jeke sot oryndaýshylarynyń qoldanystaǵy zańnama normalaryna, boryshkerdiń múlkine tyiym salý kezinde atqarýshylyq is júrgizý taraptarynyń quqyqtaryn buzýyna, sondai-aq jeke sot oryndaýshylary qyzmetinde transparenttiliktiń bolmaýyna jáne osy saladaǵy tiisti memlekettik baqylaýǵa bailanysty», - deidi senatorlar.
Osyǵan bailanysty, kreditorlar men boryshkerlerdiń múddelerin qorǵaý úshin senatorlar zańnamany jetildirý jóninde shara qabyldaýdy usyndy.
«Azamattardyń jalǵyz turǵyn úiin óndirip alýǵa tyiym salýdy belgileýdi, tiisti NQA-ǵa bankterdiń qaryz alýshylardyń kepilge salynǵan múlkin satý jónindegi saýda-sattyqqa qatysýyn boldyrmaityn normany engizýdi, qaryz alýshy óziniń qarjylyq jaǵdaiyn jaqsartqanǵa deiin sharttyń talaptaryn oryndamaǵan kezde banktik qaryz boiynsha merzimin keiinge qaldyrý múmkindigin qaraýdy, bankterdiń banktik qaryz shartynda kózdelmegen qaryz alýshynyń múlkin óndirip alýyna tyiym salýdy belgileýdi jáne jeke sot oryndaýshylarynyń qyzmetin memlekettik baqylaý, olardyń laýazymdyq ókilettikterin tiisinshe oryndamaǵany, kásibi deńgeiin arttyrǵany úshin jaýapkershiligin kúsheitý», - dep atap ótti senatorlar.
