Foto: Ashyq derekkózden
Qańtar oqiǵasy kezinde tóńkeris jasaýǵa umtylǵandardyń kim ekeni búkpesiz aitylýy kerek. Májilis depýtattary Bas prokýrordyń atyna joldaǵan depýtattyq saýalynda osyndai talap qoidy, dep habarlaidy Ulysmedia.kz portaly.
“Búkil eldi dúr silkindirgen «Qasiretti qańtar» oqiǵasyna 1 jyl boldy. Sol kúnderi halqymyz buryn-sońdy bolmaǵan qaýip-qatermen betpe-bet keldi. Memleketimizdiń tutastyǵy men myzǵymas egemendigine zor qaýip tóndi. Qańtarly kúnderde Táýelsizdiktiń qadir-qasietin, tynyshtyq pen beibitshilik qanshalyqty mańyzdy ekenin jan-júregimizben sezindik.
Qańtardyń basy Mańǵystaýda óris alǵany belgili. Oqiǵa suiytylǵan gaz baǵasyn tómendetý kerek degen uranmen bastaldy. Basynda beibit túrde bastalǵan sherýdi arandatýshy toptar paidalanyp, onyń sońy iri qalalarda tártipsizdik pen qaiǵyly oqiǵalarǵa ulasty”, – deidi depýtattar.
Májilismenderdiń sózinshe, tóńkeris jasaýǵa umtylǵandardyń basynda belgili saiasi laýazymdaǵy adamdardyń bolǵany anyq.
“Olar satqyndyq jasap, Memleket basshysyna eldegi ahýal týraly jalǵan aqparattar berdi. Ishten shyqqan jaýlar, muqiiat oilastyrylǵan aýqymdy operatsiiada, kásibi daiyndyqtan ótken baskeser-sodyrlardy esh tartynbastan paidalandy. Iri shaharymyz aiaýly Almaty men keibir qalalarymyzda urystar oryn aldy. Eń sumdyǵy ishki jáne syrtqy jaýlarymyz birige qylmystyq qimyl jasap, bilikke qarsy qoldarynan kelgenin istedi. Olar memlekettik organdarǵa, strategiialyq nysandarǵa, qarý-jaraq dúkenderi men bizneske tiesili ǵimarattarǵa aiaýsyz shabýyldar uiymdastyrdy. Shyn máninde, bul eldik pen memleketimizge tóngen asa qaýipti syn-qater edi”, – delingen depýtattyq saýalda.
Halyq qalaýlylary jyl basynda halyq talabyn eskere kele, qańtar qasiretin ashyq talqylaý úshin, «Jańa Qazaqstan» depýtattyq toby Bas prokýrorǵa depýtattyq saýal joldaǵanyn eske saldy.
“Ol saýalǵa Parlamentte arnaiy jaýap berildi. Shyndyǵyn aitqanda, Májilis tórinde memlekettik tóńkeriske itermelegen oqiǵany mundai keń aýqymdy talqylaý eshqashan bolmaǵan. Quqyq qorǵaý organdary tergeý qorytyndylary týraly esep berip, bári ashyq aityldy. Sol kezde birinshi ret qaitys bolǵan 238 adamnyń tizimi men 3 myńnan astam qarýdyń urlanǵany habardar etildi. Qoǵamdy mazalaǵan suraqtardy búkpesiz qoidyq. Birine jaýap alsaq, endi keibirine tergeý amaldarynan soń naqty jaýap aitylady delindi”, – deidi májilismender.
Halyqtyń kókeiinde áli de jaýaby joq suraqtar jetkilikti ekenin aitqan depýtattar tiisti kúshtik qurylymdar men memlekettik organdardan jyldyń basynda Májilistiń alǵashqy jalpy otyrysyna kelip, joǵaryda aitylǵan jáne basqa da saýaldarǵa búkpesiz ashyq jaýap berýdi talap etti.
