Avtokólikti tehnikalyq baiqaýdan ótkizý rásimi formaldy túrde atqarylyp, sybailas jemqorlyqqa ainalyp otyr. Bul týraly Májilistiń jalpy otyrysynda depýtat Aiqyn Qońyrov aitty, dep habarlaidy QazAqparat.
Qazirgi qoǵamda memleket qabyldanǵan sheshimder men jasalǵan is-áreket úshin jeke jaýapkershilik saiasatyn belsendi júrgizip jatyr. Azamattardyń, biznestiń jáne memleket qyzmetiniń túrli baǵyttary boiynsha azamattyq-quqyqtyq jaýapkershilikti saqtandyrý institýty qalyptasýda.
«Qazaqstan Halyq partiiasy» fraktsiiasy Úkimettiń nazaryn azamattardyń jeke múlkiniń qaýipsizdigine qatysty jaýapkershiligin baqylaýdyń qoldanystaǵy tetigine aýdarady. Atap aitqanda, jeke tulǵalardyń jeke maqsattary úshin paidalanylatyn kólik quralyn mindetti tehnikalyq baiqaýdan ótkizýdi talap etý týraly másele kóterilip otyr. 2021 jylǵy 1 qarashadaǵy jaǵdai boiynsha, Qazaqstanda jyl saiynǵy tehnikalyq baiqaýdan ótýge mindetti 2,7 mln kólik quraly (jalpy kólik sanynyń 72%) bar. Avtokólik ieleriniń basym bóligi zańǵa baǵynatyn azamattar. Olar 2-5 myń teńge aralyǵynda tiisti tólemdi tóleidi jáne tehnikalyq baiqaýdan ótkeni týraly akt alady», - dep toqtaldy Qońyrov.
Onyń aitýynsha, osy salanyń básekeli ortaǵa berilgenine jáne tehnikalyq baiqaý ótkizetin jeke stantsiialar jelisiniń qurylǵanyna qaramastan, tehnikalyq baiqaýdan ótý rásimi formaldy túrde atqarylyp, sybailas jemqorlyqqa ainalyp otyr.
«2021 jyly Kólik komitetiniń qyzmetkerleri qurǵan uiymdasqan qylmystyq toptyń (UQT) joly kesildi. 2017-2021 jyldar aralyǵynda UQT naqty tehnikalyq baiqaýsyz 260 myńnan astam diagnostikalyq karta jasaǵan. Bul isti el boiynsha jalǵan tulǵalarǵa tek «qaǵaz júzinde» rásimdelgen 28 kompaniia júzege asyrǵan. Tirkelgen mekenjailarda tehnikalyq baiqaý ortalyqtary, qoldanystaǵy zańnamaǵa sáikes, qajetti tehnikalyq jabdyq, tehnikalyq baiqaý ótkizetin jer jáne maman bolmaǵan.
«Tehnikalyq baiqaý formaldy sharaǵa ainalyp, sybailas jemqorlyq táýekelin týǵyzǵan jáne kólik quraly iesi men jol qozǵalysynyń basqa qatysýshylarynyń qaýipsizdigin qamtamasyz etýge yqpal etpegen. «Qazaqstan Halyq partiiasy» fraktsiiasy elimizdegi avtobýstardan, júk kólikterinen jáne taksi retinde kommertsiialyq maqsatta paidalanylatyn kólik quraldarynan basqa avtokólikterdiń mindetti tehnikalyq baiqaýyn jáne kólik ielerin ákimshilik jaýapkershilikke tartýdy alyp tastaý oryndy dep sanaidy», - dedi Qońyrov.
