Parlament Májilisiniń jalpy otyrysynda «Halyq Kommýnisteri» fraktsiiasy áleýmettik qyzmetkerler eńbekaqysyn kóterýge qatysty usynys jasady, dep habarlaidy "Ult aqparat".
«Bizdińshe, Úkimet tarapynan halyqqa qyzmet kórsetý ortalyqtary jumysyna kóbirek kóńil bólý kerek. Osy ortalyqtar qyzmetkerleri úshin áleýmettik yntalandyrýǵa erekshe nazar aýdarý qajet», - dep toqtaldy Májilis depýtaty Magerram Magerramov Úkimet basshysy Asqar Maminniń atyna joldaǵan depýtattyq saýalynda.
Osy oraida ol atalǵan ortalyqtar qyzmetkerleriniń eńbekaqysy tiisti deńgeide emes ekenin ári áleýmettik paket máselesine ekpin qoiý kerektigin jetkizdi.
«Qyzmetkerlerdiń koronavirýs nemese virýsty pnevmoniiaǵa shaldyǵýy qaýpi óte joǵary, olar turǵyndarmen tikelei bailanysta jumys isteýde. Sonymen qatar halyqqa qyzmet kórsetý ortalyqtary qyzmetkerleriniń mártebesin aiqyndaýdy usynamyz. Olar memlekenttik jáne azamattyq qyzmetshiler sanatyna jatpaidy», - dedi depýtat.
Budan bólek ol qarttar úii, balalar úii sekildi áleýmettik mekemeler qyzmetkerleri, beiimdeý ortalyqtary mamandary mańyzdy qyzmet atqaryp jatqanyn atap ótti.
«Tómen eńbekaqy men áleýmettik yntalandyrýdyń bolmaýy osy mekemelerdegi jumys jas mamandar úshin tartymsyz. Bul óz kezeginde kadrlar tapshylyǵy problemasyna alyp kelýde. Osy mekemelerdiń áleýmettik ári meditsinalyq qyzmetkerleri eńbekaqyny kóteretin kezde umyt qalady», - dedi M. Magerramov
Bul turǵyda depýtat atalǵan mekemelerde jumys istep júrgen barlyq qyzmetkerler úshin laiyqty jumys jaǵdaiyn jasaýǵa qatysty usynys engizdi.
