Parlament Senatynyń depýtattary Mihail Bortnik pen Baqtybai Shelpekov Mańǵystaý óńirine jumys sapary aiasynda Aqtaý teńiz porty arnaiy ekonomikalyq aimaǵynda boldy. Arnaiy ekonomikalyq aimaqtyń basshylyǵymen kezdesý barysynda AEA qyzmetiniń nátijeleri men onyń damý keleshegi talqylandy, dep habarlaidy "Ult aqparat" joǵary palatanyń baspasóz qyzmetine silteme jasap.
Senatorlar arnaiy ekonomikalyq aimaqqa qatysýshy kásiporyndarda: «Aqtaý teńiz portynda», jylyna 160 myń tonna asfaltbeton óndiretin «Kaspii Tas Jol» qiyrshyq tas-mastikalyq zaýytta jáne gaz-germetikalyq qosylysy bar qýaty jylyna 45 myń tonna qubyr jasalatyn «Qazaqstan Paip Treders» qubyr kesý zaýytynda boldy.
Talqylaý barysynda salynǵan 1 teńge biýdjettik investitsiiaǵa 19,1 teńge jeke investitsiialar tartylǵany, sondai-aq 4 teńge salyq aýdarymdary tólengeni atap ótildi. Sonymen qatar problemalyq máseleler aityldy, onyń ishinde jańa áleýetti investorlardy tartý úshin AEA qyzmetiniń basym baǵytyn aýystyrý, arnaiy aimaqtyń infraqurylymyn salýdy respýblikalyq biýdjetten qarjylandyrýdy jalǵastyrý múmkindigin qarastyrý, sondai-aq salyq zańnamasynyń keibir máseleleri qaraldy.
Depýtattar óńirlerdiń ekonomikasy men shaǵyn jáne orta biznesti damytýdy memlekettik qoldaý sharalary týraly habardar etti, onyń ishinde 2019 jylǵy naýryzda qabyldanǵan «Arnaiy ekonomikalyq jáne indýstriialyq aimaqtar týraly» zańnyń negizgi erejeleri egjei-tegjeili túsindirildi.
Senatorlar sondai-aq Aqtaý qalasyndaǵy Á.Kekilbaev atyndaǵy Mańǵystaý oblystyq tarihi-ólketaný murajaiynyń ujymymen de kezdesti. Óńirdegi murajai isin qoldaý, jas mamandardy daiarlaý, murajaiǵa kelýshilerdi kóbirek tartý úshin qazirgi zamanǵy ádis-tásilderdi engizý máseleleri jan-jaqty talqylandy.
Depýtattar sonymen qatar qýattylyǵy táýligine 25 myń tekshe metr bolatyn «Kaspii tushytý zaýyty» seriktestiginde de boldy. Talqylaý barysynda aýyz sý óndirýdi táýligine 40 myń tekshe metrge deiin arttyrý máseleleri qozǵaldy. Senatorlar 2025 jylǵa qarai táýligine 95 myń tekshe metrden astam aýyz sý tapshylyǵyn joiý qajettigin atap ótti.
Al senatorlar Manap Kóbenov pen Nurjan Nursipatov Pavlodar oblysyndaǵy Aqtoǵai aýdanyna jumys sapary barysynda Mútkenov aýyldyq okrýginiń Jańabet aýylyndaǵy Q.Nyǵmanov atyndaǵy orta mektepte boldy. Depýtattarǵa qazirgi zamanǵy talaptarǵa sai qosymsha jańa korpýstar men sport zaldary kórsetildi.
Kezdesý barysynda depýtattar Qazaqstan Respýblikasynyń Bilim jáne ǵylym salasyn damytýdyń 2020-2025 jyldarǵa arnalǵan jańa memlekettik baǵdarlamasy týraly habardar etti. 2016-2019 jyldary pedagog kadrlardyń sany jarty million adamnan asqany, áitse de, bilim berý salasyna jyl saiyn mamandar daiarlanyp jatsa da pedagogikalyq kadrlarǵa qajettilik áli de saqtalyp otyrǵany atap ótildi. Aýyldyq jerlerdegi mektepterge bilikti muǵalimderdi tartýǵa jáne alyp qalýǵa bailanysty jol jáne turǵyn úi sýbsidiialary, jeńildikter men preferentsiialar jáne taǵy basqa pármendi tetikter bolmai otyr. Pedagogikalyq kadrlardy daiarlaý jáne damytý júiesindegi oń ózgeristerge qaramastan, bilikti pedagog kadrlardy tartýǵa jáne ornyǵyp qalýyna teris áser etetin birqatar máseleler saqtalýda. Sondyqtan baǵdarlamada elimizdiń pedagogikalyq áleýetin damytý salasyndaǵy problemalardy sheshý boiynsha sharalar qarastyrylǵan.
Senatorlar Aqtoǵai aýyldyq okrýginde ornalasqan «Aqtoǵai-Agro» óndiristik nysanynda da boldy. Osy kásiporyn basshylyǵymen áńgimelesý barysynda ósimdik sharýashylyǵy ónimderi kólemin ulǵaitý maqsatynda saqtaý qoimalaryn salýdy jalǵastyrý jáne kásiporyndy damytýdyń basqa da ózekti máseleleri qozǵaldy.
Senatorlar nysandardy aralap shyqqannan keiin Aqtoǵai aýdany ákimdiginde aýdan aktivimen kezdesti.
Júzdesý barysynda Jańabet aýylyndaǵy dárigerlik ambýlatoriianyń qurylysyna, Qojamjar aýyldyq okrýgindegi Talinka ózeniniń arnasyn tazartýǵa, Aqjol aýylynyń ishindegi joldardy asfalttaýǵa (5,6 km), uialy bailanystyń qoljetimdiligin qamtamasyz etýge, barlyq maýsymda jumys isteitin sý qubyryn salýǵa jáne oblystyq mańyzy bar Jolboldy-Jalaýly (91-11km) baǵyty boiynsha joldy asfalttaýǵa qatysty máseleler qozǵaldy.
