Elordada QR Parlamentiniń Májilis depýtaty Nurjan Áltaevtyń bastamasymen zorlaý qylmysyna qatysty zańdy qataitý máselesi boiynsha dóńgelek ústel ótip jatyr, dep habarlaidy QazAqparat tilshisi.
QR Bas prokýratýrasy, «NurOtan» partiiasynyń qoǵamdyq uiymdar men advokattardyń qatysýymen ótken jiynda QR Parlamentiniń Májilis depýtaty Nurjan Áltaev zorlaý qylmysyn orta aýyr qylmystan aýyr qylmys túrine aýystyrýdy usyndy.
«Áielderge qatysty zorlyq-zombylyq jiilip ketti. Bul - bizdiń namysymyzǵa tietin tendentsiia. Sondyqtan, zorlaý qylmysyn orta aýyr sanattan aýyr sanatqa ótkizýimiz kerek. Analarymyz ben qaryndastarymyzdyń aryn taptatyp qoiyp, qarap otyrsaq, eldigimiz qaisy? QR Prezidenti Qasym-Jomart Toqaev bul máseleni kóterip, aldaǵy Joldaýynda osyǵan qatysty naqty tapsyrmalar beretinin aitty. Biz de osy máselege óz únimizdi qosý úshin bas qosyp otyrmyz», - degen depýtat qazaq tarihynda mundai qylmys ólimmen jazalanǵanyn eske aldy.
«Eger zorlaý qylmysyn aýyr sanatqa ótkizsek, eki jaqtyń kelisimimen isti jabý múmkin bolmaidy. Zorlyq jasaǵan adamdy bas bostandyǵynan aiyrý jazasyn da qatańdatyp, merzimin uzartý qajet degen oidamyn. Al zorlyqqa tap bolǵan áiel adamdarǵa tergeý bastalǵan kezden bastap barlyq jaǵdai jasalýy kerek. Birinshgiden, psiholog bólinýi kerek. Ekinshiden, memlekettiń qarjylandyrýymen advokat bólinýi kerek. Kýágerlerdi qorǵaý júiesi, zardap shegýshini qorǵaý júiesi boiynsha da zorlyq kórgen adamnyń quqyǵy qorǵalýy qajet», - dedi Nurjan Áltaev.
Depýtat adam zorlaý siiaqty aiýandyq qylmys jasap sottalǵanymen, merziminen buryn bosap jatqandar bar ekenin de aitty.
«Osyndai qylmys jasaǵany úshin sottalǵandardyń keibiri merziminen buryn bosap jatady. Olai bolmaýy kerek. Biz dál osy zorlyq qylmysy úshin sottalǵan adamdardy merziminen buryn shartty bosatý babyn zańnan alyp tastaý kerek degen usynys engizbekpiz», - dedi ol.
