Májilis depýtaty Aiqyn Qońyrov jumysynan aiyrylǵan kezde tólenetin áleýmettik tólemniń óte az ekenin aityp, járdemaqyny kóterýdi usyndy, dep habarlaidy Sputnik Qazaqstan.
Qońyrovtyń aitýynsha, elimizde ortasha jalaqy mólsheri óskenimen, jumysynan aiyrylǵandarǵa beriletin áleýmettik tólem, kerisinshe, azaiyp barady. Máselen, byltyr memlekettik áleýmettik saqtandyrý qorynan tólenetin áleýmettik tólemniń mólsheri 24 816 teńgeni quraǵan. Al respýblika boiynsha ortasha jalaqy 176 myń teńgege jetti. Osy jyldyń alǵashqy jartyjyldyǵynda jalaqy 177 myń teńgege deiin ósse, járdemaqy 22 736 teńgege deiin tómendegen.
"Tamyzdaǵy derek boiynsha elimizde ortasha ailyqtyń mólsheri 188 myń teńgege jetti. Al saqtandyrý qorynan tólenetin áleýmettik tólem 22 myń 069 teńgege deiin azaidy. Iaǵni, jalaqy artqan kezde, áleýmettik tólem, kerisinshe, azaiady", - deidi Qońyrov premer-ministrge joldaǵan depýtattyq saýalynda.
Onyń aitýynsha, áleýmettik qorǵa aýdarym jasaǵan kezde, jalaqy ádeii tómendetiledi. Ne bolmasa, elimizde jalaqy resmi statistikada kórsetilgennen áldeqaida az.
"Áleýmettik tólem jańa jumys izdep júrgen adamdardyń kúnkórisine de jetpeidi. Tipti, resmi normalar boiynsha eń tómengi kúnkóris deńgeii 29 668 teńgeni quraidy. Iaǵni, jumysynan aiyrylǵandar alatyn áleýmettik tólemnen 1,4 ese artyq. Sonda jumysynan aiyrylǵan adam otbasyn qalai asyraidy?!", - dep ashýlandy Qońyrov.
Májilismenniń sózine súiensek, keibir óńirlerde jaǵdai budan da qiyn. Máselen, Qostanai, Qyzylorda, Aqmola, Almaty jáne Soltústik Qazaqstan oblystarynda tólemniń ortasha mólsheri 15 myń teńgeden aspaidy.
"Jumystan aiyrylǵan kezde tólenetin tólemniń mólsheri, tym quryǵanda, eń tómengi kúnkóris deńgeiinen asýy kerek dep sanaimyz", - dedi Qońyrov.
Sondai-aq, depýtat jumysynan aiyrylǵandar úshin saqtandyrýdyń tolyqqandy júiesin qurýdy usyndy.
