Májilis depýtaty Ǵani Tashqaraev jastarǵa satyp alý quqyǵynsyz baspana berý baǵdarlamasynyń talaptaryn jeńildetýdi surap, Premer-Ministrdiń orynbasary Eraly Toǵjanovqa saýal joldady, dep habarlaidy QazAqparat.
Elbasy N. Nazarbaevtyń bastamasymen 2019 jyly «Jastar jyly» ashylǵanda Nur-Sultan, Almaty, Shymkent qalalarynda jastarǵa jyl saiyn 1000 páter berý usynylǵan edi.
«Munda ótinish berýshiniń ai saiynǵy tabysyn keminde 40 AEK mólsherinde rastaityn sońǵy alty aidaǵy tabysy týraly anyqtama kórsetýdi talap etedi. Baǵdarlamanyń basynda bul somma 101 000 tengeni qurasa, 2021 jyldan bastap bul 116 600 tengeni qurady. Ulttyq statistika biýrosynyń málimeti boiynsha respýblikada 20-29 jastaǵy azamattarymyzdyń sany 2 537 252-ge jetti. Qalada turatyn jastardyń úlesi – 1 510 892. Bul kórsetkish jyldan jylǵa artyp keledi», - dep atap ótti depýtat Májilistiń plenarlyq otyrysynda.
Halyqtyń orta eseppen jan basyna shaqqandaǵy tabystaryn baǵalaý boiynsha, bul mólsher 2021 jyldyń 1 toqsanyna Shymkent qalasynda 76 982 teńge, Almaty qalasynda 166 554 teńge, Nur-Sultan qalasynda 179 722 tengeni qurap otyr.
«Óńirlerge jumys sapar barysynda jastar tarapynan birqatar máseleler men usynystar aityldy. Atap aitqanda, jaldamaly páterlerdi alý konkýrsyna qatysý úshin turǵyn úige muqtaj jas mamandar úshin jalaqy mólsheri tym joǵary ekendigi aityldy. Jalǵa beriletin turǵyn úidi konkýrs boiynsha alý qiyn. Jumysshy jastardyń aitýynsha, páter alý úshin ailyq kórsetkishti (40-tan 25 AEK-ke deiin ) tómendetý –megapolisterdegi eńbegi óte qajet jas otbasylar men jas mamandarǵa úlken kómek. Joǵaryda aitylǵandardyń negizinde jastardy qoldaý maqsatynda jalǵa beriletin baspanaǵa arnalǵan konkýrstarǵa qatysýshylarǵa qoiylatyn talaptardy ózgertý múmkindigin qaraýdy suraimyn.
Bul baǵdarlamanyń maqsaty megapolisterdegi suranysqa ie mamandyqtardyń jas mamandarymen qamtamasyz etý ekenin eske salǵym keledi. Osyǵan bailanysty jas mamandardyń tabystaryna qoiylatyn talaptardyń joǵarylyǵy túrindegi tosqaýyldardy belgileý orynsyz dep sanaimyz jáne jastardy jalǵa beriletin turǵyn úi konkýrsyna qatysýǵa jol beretin somalardyń, tabystardyń eseligin azaitýdy usynamyz», - deidi Ǵani Tashqaraev.
