QR Parlament Májilisiniń depýtaty Amanjan Jamalov HQKO-daǵy ólim jaǵdaiyna qatysty bildirgen pikirin túsindirdi, - dep habarlaidy "Ult aqparat" kaz.tengrinews.kz portalyna silteme jasap.
"Men adamnyń kez kelgen jerde qaitys bolýy múmkin ekenin aitqym keldi, al meni joq jerden jalmaýyzǵa ainaldyrdy", - deidi ol.
Jamalovtyń aitýynsha, depýtat baspasóz ókilderine úkimet saǵatyndaǵy máseleler jaiyndaǵy suraqtarǵa jaýap berýi tiis edi, naqtyraq aitqanda ol keden jáne salyq ákimshiliktendirýi jaily aitpaq bolypty. Biraq ol Bishimbaevtyń ustalýy, BJZQ-ǵa qatysty qylmystyq is jáne ýaqytsha tirkeýge bailanysty suraqtar qoiylady dep kútpepti.
"Kenet jýrnalist maǵan "Búgin HQKO-da adam óldi, HQKO-da ólgen adamdar úshin ózińizdi kinálimin dep esepteisiz be?" dep suraq qoidy. Suraqtyń arandatý maqsatynda qoiylǵanyn túsindim, sasyp qaldym. Men logikamen oilaityn adammyn jáne men úshin HQKO-daǵy adamnyń ólimi men ýaqytsha tirkeý týraly normany bailanystyrý qiyn boldy. Bul jaǵdaidan habarym bolmady", - dedi depýtat.
"Meniń jalǵyz qateligim - durys sózdi qoldanbaǵanym. "Ýspeh" sózin (Aita keteiik, depýtat oryssha aitqan pikirinde "Ný ýmer chelovek, s takim je ýspehom on mog, navernoe, po sostoianiiý zdorovia ýmeret i doma" degen edi - Avt.) kópshilik túsingen jetistikke jetý degen maǵynada aitqan joqpyn ǵoi. Adam ólimin jetistik dep aitýǵa bolmaityny túsinikti. Esi durys adamǵa bul sózdi oqyǵan kezde barlyǵy da túsinikti bolady. Meniń aitqym kelgeni - ólip ketý múmkindigi barlyq jerde birdei. Mundai jaǵdaida adamnyń basqa qoǵamdyq orynda qaitys bolýy da múmkin, jazmyshtyń qashan keletinin bir Alla biledi jáne sol zańdy qabyldaǵan depýtattardyń biri retinde adam óldi jáne oǵan men kinálimin dep aitý qate, shynymdy aitaiyn", - deidi Jamalov.
Májilismenniń aitýynsha, ýaqytsha tirkeýdi áýejaidaǵy qaýipsizdik sharalarymen bailanystyrýǵa bolady. Tekserý, júkti qaraý jáne jolaýshylardyń aty-jónin anyqtaý áýejai ǵimaratynda kezek týǵyzady, biraq bul sharalarǵa qatysty eshkim de syn aitpaidy, sebebi bul adamdardyń qaýipsizdigi men densaýlyǵy úshin jasalyp otyr. Ýaqytsha tirkeý normasyn engizý, depýtattyń aitýynsha, dál osyndai maqsat úshin jasalyp otyr jáne barlyq ákimshilik máseleler úkimet deńgeiinde sheshiledi.
"Men anyqtap kórdim, mundai qaiǵyly jaǵdai birinshi ret bolyp otyrǵan joq eken, Qazaqstan boiynsha buǵan deiin de HQKO-larda ólim jaǵdailary bolypty, sebebi munda kún saiyn kóptegen adam keledi. Elimiz boiynsha osyndai qaiǵyly oqiǵanyń ondaǵan jaǵdaiy bolypty jáne olardyń ýaqytsha tirkeýmen bailanysy joq. HQKO-larda ǵana emes, basqa da qoǵamdyq oryndarda bolypty. Aýrý-syrqattyń túri kóp, barlyǵyn birdei boljam bilý ońai emes. Bir jaǵdaidy ekinshisine bailanystyrýdyń qajeti joq. Dál osy jaǵdaida naqtyly bir jaittardy múddeli adamdar jaǵdaidy ýshyqtyrý úshin kórsetip otyr. Bul problema úkimet deńgeiinde sheshiledi, qajetti sharalardy júrgizý kerek, al bireýler osyndai jaǵdailardy jinastyryp júredi, iaǵni mundai jaǵdailar bireýdiń múddesi úshin de jasalyp jatady", - dep esepteidi Amanjan Jamalov.
"Al adam ólimin meniń qyzmetimmen bailanystyrý, men nelikten ózimdi kináli sezinýim kerek? Meni jalmaýyz ári adam balasyna qas retinde kórsete saldy. Ómir boiy adal eńbek ettim, ekonomika ǵylymdarynyń doktorymyn, Parlamentte eńbek etip júrmin, ekonomikalyq blok máseleleri boiynsha mamandanǵanmyn jáne paidam da az emes. Jumysymmen, qolymnan keletin ispen, bilimimmen maqtanamyn", - dedi sońynda depýtat.
Eske salaiyq, búgin, 16 qańtarda Alataý aýdandyq Halyqqa qyzmet kórsetý ortalyǵynda 1964 jylǵy Kýntakov Jaras Nýrkibaiuly qaitys boldy. Ol ortalyqqa turǵylyqty jeri boiynsha tirkelý úshin kelgen. "Azamattarǵa arnalǵan úkimet" memlekettik korporatsiiasynyń ókilderi oqiǵa kezinde "HQKO-da adam sany kóp bolmaǵan" deidi.
