Foto ashyq derekkózden alyndy
Májilis depýtaty Qazybek Isa mádeniet ministrligine qaraityn Ulttyq kinony qoldaý ortalyǵynyń jumysyn synǵa aldy, dep habarlaidy Sputnik Qazaqstan.
Depýtattyń aqparatynsha, Ulttyq kinony qoldaý ortalyǵy 2023 jylǵy memlekettik qarjylyq qoldaýǵa úmitker 153 kinojobany konkýrstyq irikteýge qatystyrmai, qujattaryn qabyldamai tastaǵan.
"283 jobanyń tek 130-yn ǵana qabyldaǵan. Sonda 60 paiyzǵa jýyǵyn dalada qaldyrdy. Bul buryn-sońdy bolmaǵan ekstsess! Buǵan deiin Ortalyqqa kelip túsken kinojobalardyń 1-5%-i qabyldanbasa, biyl jartysynan kóbin negizsiz qabyldamaǵan. Iaǵni, 153 joba jobalardy irikteitin Sarapshylar keńesine jete almai jolda qalyp otyr. Eger 153 joba óndiriske jiberiler bolsa, árqaisysynda keminde 30-60 adam jumyspen qamtylatynyn eskersek, bul 5-10 myń adamnyń taǵdyry", - deidi Qazybek Isa vitse-premer Altai Kólginov pen mádeniet ministri Ashat Oralovqa joldaǵan depýtattyq saýalynda.
Aitýynsha, qabyldanbaǵan júzdegen jobanyń ishinde byltyr Sarapshylar keńesi "Eń úzdik stsenarii" dep baǵalaǵan rejisser Azamat Sharǵynnyń "Shyrmaýyq" filmi siiaqty jobalar da bar.
"Ministrlik toqtaý salyp, ádilettilik ornatpasa, Ulttyq kinony qoldaý ortalyǵy osylai Ulttyq kinony qorlaý ortalyǵyna ainalyp ketpei me? Bul mádenietti qoldaýǵa basa nazar aýdaryp otyrǵan prezidenttiń "Ádiletti Qazaqstan" saiasatyna qarsy jasalyp otyrǵan sabotaj deýge bolady. Óitkeni, qai jobanyń deńgeii qandai ekenine baǵany qujat qabyldaityndar emes, sarapshylar keńesi berýi kerek", - dep málimdedi májilismen.
Depýtattyń aitýynsha, Ulttyq kinony qoldaý memlekettik ortalyǵy ózi shyǵarǵan ishki erejeni ózgertip tastap, Qazaqstannyń úsh zańyn – "Básekelestik týraly" zań, "Kino týraly zań" jáne "Til týraly" zańdy buzyp otyr.
"Eger Ortalyq sekildi árkim óz bilgenin istep, óziniń erejesin jasap alyp, zańymyzdy belden basyp otyrsa, onda parlament ne úshin bul jerde zań shyǵaryp otyr?!", - dep ashýlandy Qazybek Isa.
Budan bólek, Ortalyqtyń jaýapty qyzmetkerleri irikteý boiynsha eshqandai hattama jasamaǵan. Depýtattyń pikirinshe, bul óreskel zańbuzýshylyq jáne keri qaitarylǵan 153 jobanyń ádil shettetilgenine kúmán týǵyzady.
Sondai-aq Qazybek Isa Kinony qoldaý ortalyǵynda birde-bir kino salasynyń mamany joq ekenin aitady.
"Bul "aýrýhanada bir de bir dáriger joq" degenmen birdei sumdyq emes pe?! Filmderimizdiń shalajansar bolyp, ólmeli kúide bolatyny da sondyqtan. Iaǵni, kinoóndiriste kásibi biliktiligi joq mamandar jumys isteidi. Sonyń negizinde qatelikter men túsinispeýshilik jii bolyp turady", - deidi ol.
Osyǵan bailanysty "Aq jol" fraktsiiasynyń depýtattary táýelsiz jumys tobyn quryp, Ortalyq ótkizgen irikteý nátijesi boiynsha jobalardyń qujattaryna tekseris júrgizýdi, sondai-aq keleshekte mundai jaǵdaiǵa jol bermes úshin konkýrstyq irikteýdiń birkelki ashyq júiesin qurýdy usyndy.
