Búgin Parlament Májilisinde ońaltý jáne bankrottyq rásimderdi jetildirý zań jobasynyń tanystyrylymynda depýtat Serik Qusaiynov «Doing Business» reitingine súiený mindetti emes degen pikir aitty, dep habarlaidy QazAqparat tilshisi.
«Meniń usynysym bul zań jobasynda «Doing Business» reitingine súiený máselesine qatysty bolyp otyr. Meniń oiymsha, osyndai zańdarda reitingterdi basshylyqqa alý múldem qajet emes. Ózderińiz bilesizder, reitingter kei kezderde eldiń damýyna yqpal etpeidi. Ol el ekonomikasynyń túrli baǵyttarynda jáne eldiń ómirinde keide teris áserin beredi. Sondyqtan da biz reitingke emes, ekonomikanyń jaqsarýyna negizdelýimiz kerek. Reiting - ol ýaqytsha kórsetkish. Osy oraida, bul kórsetkishke súienbeý qajet», - dedi Serik Qusaiynov.
Atap aitqanda, búgin Májiliste «Qazaqstan Respýblikasynyń keibir zańnamalyq aktilerine ońaltý jáne bankrottyq rásimderin jetildirý máseleleri boiynsha ózgerister men tolyqtyrýlar engizý týraly» zań jobasy tanystyryldy.
Zań jobasynda bankrottyq rásimderdi ótkizý merzimin qysqartý eskerilgen. Bul rette kreditorlar jinalysynyń birqatar ókilettikterin mobildi kreditorlar komitetine berý, basqarýshylardyń banktik qupiiany quraityn málimetti alý tártibin jeńildetý, ádeii jáne jalǵan bankrottyq úshin jaýaptylyqqa tartý tártibin ózgertý qarastyrylǵan.
