Parlament Májilisiniń depýtaty Amanjan Jamalov onlain-nesie beretin komaniialardyń jumysyn teskerýdi surap, Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Eldegi tótenshe jaǵdai men karantinge bailanysty kirisinen aiyrylǵan azamattardyń kóbi qazir nesie alýǵa májbúr bolyp otyr. Bul sátti úiden shyǵarmai-aq, anyqtamasyz ári internet arqyly jyldam nesie beretin mikroqarjylyq uiymdar, lombardtar, qaidaǵy bir onlain-kompaniialar paidaǵa jaratyp jatyr», - degen depýtat Úkimetpen birge bul máselege Qarjylyq naryqty damytý jáne retteý agenttigi de nazar aýdarýy kerektigin aityp ótti.
Májilismenniń aitýyna qaraǵanda, zań boiynsha jyldyq tiimdi stavkanyń 56 paiyzdyq shekti mólsheri, tólenbegen ár kún úshin ósimpuldyń deńgeii 0,5 paiyz túrinde belgilengen. Zańnamalyq shekteýlerge qaramastan, onlain-nesie berýshi kompaniialar 100 paiyzdan joǵary jyldyq stavkamen nesie berýde. Odan bólek garanttyq úshin nemese qaryz bergeni úshin ondai uiymdar ártúrli komissiialardy da ala beretin kórinedi.
«Aqyrynda jyldyq tiimdi stavka 600-den 700 paiyzǵa deiin ketip jatyr. Sózim dáiekti bolýy úshin naqty mysaldarmen keltireiin. «Kredit 24» kompaniiasy óz sózimen keltirgende: «qaryz alýshy týraly málimetti tekserýde úshinshi tulǵanyń paidasy úshin tólem» engizip, onyń mólsherin qaryzdyń 56 paiyzyna teńestirgen. Bul «jyldam tabys tabý» qyzmeti 27 150 teńgeni quraidy. 100 myń teńge qaryz alǵan adamnan «jyldam tólem» qosymsha qyzmeti úshin 27 150 teńge alynǵan naqty mysaldary bar. Budan bólek kelisimde ár merzimniń ótip ketkeni úshin 3 myń teńgelik bir rettik komissiia, al merzim shartyn buzǵany úshin ýaqtyly tólenbegen tólemniń 1 paiyzdyq mólsherin tóleý sharty engizilgen», - dedi Amanjan Jamalov.
Depýtattyń aitýynsha, kelisim boiynsha eń birinshi kezekte syrtqy uiymdardyń qyzmet úshin tólemdi, qaryz berýshiniń shyǵyndaryn, syiaqyny, sodan keiin baryp qana negizgi qaryzdy tóleý kerek bolady. Aqyrynda qaryz alǵan adam eshqashan bereshekti ótei almai, paiyzdardy ótep júre beredi.
«Osyndai jaǵdaidy Qarjylyq naryqty damytý jáne retteý agenttiginiń qaida qarap otyrǵany túsiniksiz. Endi bul «indet» koronavirýstan jyldam órship barady», - dedi májilismen.
Osyǵan bailanysty depýtat Úkimetten onlain-nesie beretin kompaniialardyń jumysyn tekserýdi surady.
