© Photo : SS0 / Pexels
Májilis depýtaty Berik Dúisenbinov Aýyl sharýashylyǵy ministrliginen myńdaǵan gektar jeri bar ákim-qaralardyń aty-jónin halyqqa jariia etýdi talap etti, dep habarlaidy Sputnik Qazaqstan.
Parlament Májilisinde Ákimshilik quqyqbuzýshylyq týraly kodeksine jerlerdiń paidalanylýy men qorǵalýyn memlekettik baqylaý máseleleri boiynsha ózgerister engizý týraly zań jobasy birinshi oqylymda qaraldy.
Suraq-jaýap barysynda depýtat Berik Dúisenbinov Mýyl sharýashylyǵy ministrine jaiylymdyq jerlerge zar bolyp otyrǵan eldiń sálemin jetkizdi.
"Jaqynda elden keldik. Qai oblysqa barmasańyz, joldyń oń jaǵy da, sol jaǵy da ákimniń jeri. Qaityp jatqan jer joq. Mal ustap otyrǵan, egin egip otyrǵan kisiler jerge zárý bolyp otyr. Biraq qoly kúshtiler sol burynǵy qalpynda qaldy. Myna jerdiń ielerin shyǵaryp, taqtaǵa jazyp qoiýǵa kim kedergi?", - dep ashýlandy májilismen.
Osy oraida ol oblystarda myńdaǵan gektar jer kimge tiesili ekenin jaiyp saldy.
"Óskemenge barsańyz, jerdiń bári – Danial Ahmetovtiki, Pavlodarǵa barsańyz – Baqaýovtiki, Astananyń mańaiynda – Shókeevtiki. Ony aitýǵa bári qorqyp otyr. Jańa baiandamańyzda myńdaǵan gektar jer qaitaryldy degenińiz ótirik. Halyqtyń bári narazy. Mal ustaǵan adamdarǵa jer jetpei jatyr. Sony sizder ádemi baiandamanyń ornyna naqty qashan qolǵa alasyzdar, sony aityńyzshy. Aty-jónin jazyńyzdar, taqtaǵa ilip qoiýǵa nege uialasyzdar? Burynǵy otyrǵan bailar solai otyr", - dep ashyndy Dúisenbinov.
Aýyl sharýashylyǵy ministri Erbol Qarashókeev depýtattyń synyn orynsyz dep atady.
"Ákimderdiń jerine tiispei, olardy qorǵap otyr degendi men qabyldai almaimyn. Sebebi biyl biz 5,2 million gektar jerdi qaitardyq. Kimderdiń jeri ol? Sol buryn bolǵan ákimderdiń jerleri, oligarhtardyń jerleri. Endigi jyly da taǵy 5 mln gektar jer qaitaramyz. Ol jumys jandanady", - dep jaýap berdi ministr.
Ol ministrlik zańǵa sáikes jumys isteitinin atap ótti. Iaǵni kim bolsa da, eger ol jerdi zańdy túrde paidalanyp jatsa, oǵan eshkim tiise almaidy. Al zańnamany buzyp, paidalanyp jatqandardan jer qaitarylyp jatyr, dep sendirdi Qarashókeev.
"Jańa 5,2 million gektar jer ótirik deisiz. Qazir interaktivti karta daiyndap jatyrmyz. Depýtattyq minberden ondai sózdi aitýǵa, menińshe, bolmaidy. Sebebi biz 5,2 million gektardy kartaǵa júktep, árbir iesin kórsetýge daiynbyz. Bar jumysty joq dep aitýǵa bolmaidy", - dep renjidi ministr.
Osy kezde Berik Dúisenbinov aýyl sharýashylyǵy ministrine óńirlerge depýtattarmen birge shyǵýdy usyndy.
"Bes million gektar ma, sony bárin kórsetip berińizshi. Kóreiik, halyqtyń qaisy riza bolyp otyrǵanyn. Men sizge eldiń sózin aityp otyrmyn, oidan shyǵaryp otyrǵan joqpyn", - dep ashýlandy Májilis depýtaty.
Erbol Qarashókeev jaqyn arada qazaqstandyqtar Interaktivti kartadan memleketke qaitarylǵan 2 million gektar jerdi kóre alatynyn aitty.
