Foto: "Qazaqstan temir joly "ulttyq kompaniiasy" AQ baspasóz qyzmeti
Búgin Májilistiń jalpy otyrysynda depýtat Ádil Jubanov "Qazaqstan temir joly" ulttyq kompaniiasy jumysyndaǵy kemshilikterdi atady, dep habarlaidy QazAqparat.
«Uzyndyǵy 277 shaqyrym «Atyraý-Astrahan» tasjolynyń qurylysy 2019 jyly bastalyp, jospar boiynsha 2021 jyly bitýi tiis edi. Alaida bes jyl buryn bastalyp, eki jyl buryn bitýi tiis joldyń qurylysy óte baiaý júrip jatyr. Jumystyń júrmeýiniń basty sebebi - qurylys materialdarynyń ýaqytyly jetkizilmeýi jáne tasymaldaýshylardyń vagondardy jetkilikti deńgeide qamtamasyz etpeýi. Bul jalpy elimiz boiynsha ekonomikamyzdyń ósýine, sonyń ishinde quyrylys salasynyń damýyna úlken kedergi bolyp otyr», - dedi Jubanov Bas prokýror Berik Asylovtyń atyna joldaǵan saýalynda.
Onyń aitýynsha, qazirgi kezde QTJ ulttyq kompaniiasynyń jalpy qaryzy 2,2 trln teńgege jetken.
«Eger búginde ulttyq kompaniia kásipkerlerge jasandy túrde ákimshilik kedergiler jasap jatsa, QTJ qaryzyn qalai ótemek? Sonymen birge, kiristiń eń tabysty bóligi sanalatyn júk tasymaly qyzmetin ulttyq kompaniia nelikten básekelestik ortaǵa beredi? Bul áreketterdiń barlyǵy ulttyq kompaniianyń kirisine áser etip, jobalardy, onyń ishinde ulttyq jobalardy júzege asyrýǵa kedergi keltirip otyrǵanyn aitqym keledi. Vagondar tóńireginde qalyptasqan jaǵdai taýar baǵasyna áser etip, infliatsiia men eldiń áleýmettik-ekonomikalyq jaǵdaiyna ziianyn tigizip jatyr. Negizinde, ekonomikamyzdyń kúre tamyry sanalýy tiis «Qazaqstan temir joly» kompaniiasyna qarata aitylatyn syn óte kóp. Sebebi qoǵam ishinde kompaniia qyzmeti kóleńkeli shemalarǵa toly jáne ashyqtyq, eseptilik joq degen pikir bar», - dedi depýtat.
Bul turǵyda ol Bas prokýrordan ulttyq kompaniiaǵa qatysty tolyq qarjylyq taldaý jasaýdy jáne alynǵan qaryzdardyń maqsatty jumsalýy boiynsha júieli tekserý júrgizýdi surady.
«Sonymen qatar QTJ-nyń qazirgi jáne burynǵy basshylyǵynyń vagondardy jalǵa beretin jeke logistikalyq kompaniialarǵa qatystylyǵyna tekserý júrgizý kerek. Munymen qosa, júk tasymaly qyzmetin básekeles ortadan ulttyq kompaniiaǵa qaitarý mańyzdy», - dedi Ádil Jubanov.
