Senator Nurlan Qylyshbaev elimizdiń Premer-Ministri Asqar Maminniń atyna joldaǵan depýtattyq saýalynda kásipkerlerdiń Qytaimen shekara arqyly taýar tasymaldaý kezinde kezdesetin máselelerin kóterdi, dep habarlaidy QazAqparat agenttigi.
Jaqynda senatorlar Almaty oblysynda kóshpeli otyrys ótkizip, «Altynkól» jáne «Nur Joly» keden beketterine baryp, memlekettik organdarmen jáne kásipkerlermen kezdesý ótkizdi. Sol kezdesýde kóterilgen máselelerdiń biri – Qytaimen shekarany kesip ótý qiyndyqtary. Ótkizý pýnktterinde júk avtomashinalary men poiyzdar jinalyp qaldy. Shekarada júkterdiń turyp qalýyna bailanysty otandyq kásipkerler biznes-qoǵamdastyq tarapynan úlken shyǵyndarǵa ushyrady.
Senator sondai-aq kásipkerlermen kezdesý barysynda zańnamalyq qamtamasyz etýdi talap etetin kóptegen máseleler kóterilgenin atap ótti. Osyǵan bailanysty depýtat ótkizý beketterindegi jaǵdaidy jaqsartý boiynsha birqatar naqty usynystar aitty.
«QTJ» UK» aktsionerlik qoǵamynyń tsifrlyq transformatsiiasynyń keshendi strategiiasyn jasaý, qaǵaz qujat ainalymyn alyp tastaý, lokomotivtik tartqysh, sondai-aq temir jol jelisi máselelerin sheshý, biryńǵai aqparattyq derekqor qurý arqyly kóliktik baqylaý ýchaskesin tsifrlandyrý, qytai tarapymen júrgiziletin kelissózder aiasynda memlekettik organdar «Nur joly» ótkizý pýnktinde turyp qalǵan bos tirkemelerdi qabyldaýdy qamtamasyz etý, temirjol, avtomobil kóligimen ótkiziletin qazaqstandyq eksporttyq taýarlardy qabyldaý máselelerin pysyqtaý qajet», - dedi depýtat Senattyń jalpy otyrysynda.
