Senator Murat Baqtiiaruly qarjylandyrý máselesine bailanysty Kishi Araldy joǵaltyp alýymyz múmkin ekenin aitty, - dep habarlaidy Tengrinews.kz.
Premer-ministrdiń atyna joldaǵan saýalynda depýtat 2005 jyly "Syrdariianyń arnasyn retteý jáne Kishi Araldy qutqarý" jobasy aiasynda Kókaral bógeti salynǵanyn atap ótti. Onyń aitýynsha, bul joba respýblikalyq biýdjetten jáne Dúniejúzilik bankten qarjylandyrylǵan. Búginde bógettiń 200 metrin sý shaiyp ketken jáne bul ýchaskeni jedel jóndeý qajet.
"Jobanyń quny tórt milliard 582 million teńge bolady. Biyl qyrkúiekte ótken respýblikalyq biýdjet komissiiasy otyrysynda Ekologiia, geologiia jáne tabiǵi resýrstar ministrligine Sý resýrstary komitetiniń biýdjetin qaita bólý arqyly jobany bastaý úshin 500 million teńge bólindi. Alaida 2023-2025 jyldarǵa arnalǵan respýblikalyq biýdjette bul jobany qarjylandyrý qarastyrylmaǵan. Prezidenttiń Kókaral bógetin nyǵaitý týraly tapsyrmasy elenbei qaldy", - dep ashýlandy senator.
Depýtattyń aitýynsha, qazir Kókaral bógetin saqtap qalmasa, ekologiialyq apat bolýy múmkin. Iaǵni, búginde 27 milliard tekshe metr sý jinalǵan Kishi Araldy joǵaltyp alýymyz múmkin.
"Osyǵan bailanysty jobanyń aýqymdylyǵy men mańyzdylyǵyn eskere otyryp, qalǵan tórt milliard 82 million teńgeni nysannyń qurylys jumystaryn aiaqtaý úshin 2023-2025 jyldarǵa arnalǵan respýblikalyq biýdjet aiasynda bólýdi suraimyz", - dedi Baqtiiaruly.
