QR Parlamenti Senatynyń depýtaty Rysqali Ábdikerov túrli ǵimarattardaǵy myńdaǵan lifttiń jaǵdaiy nashar ekeni týraly aitty, dep habarlaidy Sputnik Qazaqstan.
Depýtat premer-ministrge saýal joldap, liftterdiń nashar jaǵdaiy men olarǵa tehnikalyq qyzmet kórsetý deńgeiine qatysty máselelerdi kóterdi.
Ol 2012 jyly Qazaqstanda lift salasyn litsenziialaýdyń kúshi joiylǵanyn eske saldy. Sonyń saldarynan jaýapkershiligi tómen kompaniialar paida bolyp, adamdardyń jaraqaty men ólimine ákeletin tótenshe jaǵdailar týyndai bastady.
"QR indýstriia jáne infraqurylymdyq damý ministrligi men Qazaqstannyń ulttyq liftter qaýymdastyǵynyń málimeti boiynsha, 2018-2022 jyldar aralyǵynda elimizde liftterdiń aqaýy saldarynan 13 tótenshe jaǵdai tirkelip, onyń 8-i qaiǵyly jaǵdaimen aiaqtaldy. Búgingi tańda kópqabatty turǵyn úilerde 30 myńnan astam lift bar, onyń 4 myńnan astamyna jóndeý nemese aýystyrý qajet", - dedi Rysqali Ábdikerov Senattyń jalpy otyrysynda.
Onyń aitýynsha, ásirese Pavlodar, Qaraǵandy, Shyǵys Qazaqstan, Batys Qazaqstan, Aqtóbe oblystaryndaǵy turǵyn úilerdegi liftterdiń tozyǵy jetken.
Sonymen qatar, Rysqali Ábdikerov otandyq lift óndirýshilerdi qoldaýdy kúsheitýdiń mańyzdylyǵyn atap ótti. Resmi derek boiynsha, Qazaqstanǵa jyl saiyn 5 myńnan astam lift jetkizilse, otandyq kompaniialar bul suranystyń 21%-ten sál astamyn ǵana qanaǵattandyra alady.
"Jergilikti ákimdikter bul salany damytýǵa qajetti qoldaýdy kórsetpei otyr. Memleket basshysy Qasym-Jomart Toqaev Qazaqstan halqyna arnaǵan joldaýynda "Kásipkerlikti qoldaý barysynda ásirese orta bizneske erekshe kóńil bólý kerek" ekenin aitty. Sondyqtan eń aldymen otandyq óndiristi damytýǵa, onyń ishinde liftterdi montajdaý men qyzmet kórsetý boiynsha jumystardyń tiimdiligine qol jetkizýge basa nazar aýdarý qajet. Osylaisha, búgingi tańda qolǵa alynǵan sharalar liftini modernizatsiialaý boiynsha tiisti nátije bermei otyr", - dedi senator.
Osyǵan bailanysty depýtat salany qoldaýdy kúsheitýdi, apatty jaǵdaidaaǵy liftterdi aýystyrýǵa kredit bólýdi, ulttyq standarttardy saqtaýdy qatańdatýdy jáne olar talapqa sai oryndalmaǵan jaǵdaida ákimdikterge mundai lift kompaniialaryna aiyppul salýǵa múmkindik berýdi, sapasy kúmán týdyratyn liftterdiń jetkizilýin shekteýdi usyndy.
