QR Parlament Májilisiniń depýtaty Baqytbek Smaǵul bilim ministriniń atyna saýal joldady, dep habarlaidy "Ult aqparat".
Onyń aitýynsha, qoldanystaǵy oqýlyqtardyń basym bóligi orys mektebinde oqityn shákirtterge arnalǵan. Onda kórsetilgen mysaldar da soǵan beiimdelgen. Sonyń bári qazaq tiline aýdarylǵannan keiin oqýshyny bylai qoiǵanda, ustazdar úshin de kóp qiyndyq týǵyzady.
«Ókinishke qarai, respýblikamyzdyń eń tańdaýly pedagog mamandary, ustazdar men ádiskerlerden quralǵan bilikti komissiia tańdaǵan keibir oqýlyqtar ótpei qalyp jatady. Dálel retinde birneshe mysal kelitire keteiin. «Mektep» baspasynan shyqqan 7-shi synyptyń fizika páni oqýlyǵynyń avtorlary - Toqbergenova men Krongarttyń orys jáne qazaq tilderindegi oqýlyqtarynda kóptegen mátindik sáikespeýshilikter kezdesedi. Mysaly, qazaq tilindegi oqýlyqtyń 109-shy betindegi jattyǵýda «bala báteńkesi tabanynyń aýdany» dep berilýi kerek mátin «bala báteńkesiniń aýdany» dep berilgen. 120-shy bette atmosferalyq qysym taqyrybyndaǵy 4-37 sýrette kórsetilgen tájiribeniń túsiniktemesinde «kolbadaǵy azdap jeńildeidi» dep jazylýy kerek sóilemniń ornyna «kolbadaǵy azdap aýyrlaidy» dep jazylǵan», - dedi B.Smaǵul búgingi plenarlyq otyrysta.
«Almaty» baspasynan shyqqan matematikadan qazaq tilindegi oqýlyqta da qateler az emes. Ulttyq valiýtany «teńge» dep jazýdyń ornyna «KZ» dep kórsete salǵan.
«Sosyn bir esepte «shańǵyshy men velosipedshiniń ushý jyldamdyǵyn anyqta» delingen. O zaman da, bu zaman, velosipedshi men shańǵyshynyń ushqanyn kórgen joqpyz. 125-shi bettegi sýrettiń astynda «Asfendiiarov Sanjar Japaruu» dep jazylǵan, durysy - Asfendiiarov Sanjar Japaruly. 135 bet, 5-shi tapsyrmada Dori, Nori, Ori degen qazaqqa jat esimdermen mysaldar keltirgen. Jattyǵýǵa mysal bolatyn qazaqtyń aty joq pa? 7-shi tapsyrmada «vid transporta» degen artyq sóz júr», - dep atap kórsetti B.Smaǵul.
Budan bólek, 4-synypqa arnalǵan ádebiettik oqý kitabynda YouTube-ten mýltfilm kórýge tapsyrma berilgen. Al bir tapsyrmasynda «Ratatýi» degen sheteldik mýltfilmin kórip, onyń mazmunyn aityp berýge mindet qoiylyp otyr.
«Onyń ornyna tól tilimizde berilgen týyndy joq pa? «Ratatýi» syndy mýltfilmderdi oqýlyqta jarnamalaýdyń esh qajeti joq. Biz keltirgen mysaldar bir-eki oqýlyqtan ǵana, budan bólek, grammatikalyq ári texnikalyq qateler kóp», - dedi B.Smaǵul.
