Parlament májilisiniń depýtaty Gúljan Qaraǵusova biýdjet qarajatyn durys jumsaýdyń mańyzdylyǵyn eske saldy, dep habarlaidy Sputnik Qazaqstan.
Onyń aitýynsha, respýblikalyq biýdjetten qarjy tolyǵymen bólinedi. Búkil qarajat ministrlikterdiń suraýy boiynsha taratylady. Alaida biýdjet qarjysyn tiimdi jumsaý jáne igerý jaǵynan biraz suraqtar bar.
"Biz qansha surasa da, bere salamyz. Álemniń bar aqshasyn jumsaýǵa da bolady. Degenmen, osy oraida mańyzdy bir suraq týyndaidy. Odan ne ózgeredi? Aqshanyń bólingenin ár azamat qalai biledi? Halyq jaǵdaidyń jaqsarǵanyn qaidan kóredi? Biraz qarajat bólindi ǵoi. Taǵy eskerteiin, memlekettiń qarjysy – ol bizdiń aqshamyz, bizdiń salyǵymyz. Iá, ákimder men taǵy basqalary suraidy. Olardyń da úlesi (salyq tóleý boiynsha) bar, biraq kóp emes", - dedi Qaraǵusova 2020-2022 jyldarǵa arnalǵan biýdjetti talqylaýǵa arnalǵan jiynda.
Depýtattyń aitýynsha, parlamentte otyrǵandar - eń aldymen Qazaqstan azamattary, olar da tiisti salyqtardy tóleidi, mindetterin jaýapkershilikpen atqaryp júr.
Sondai-aq Gúljan Qaraǵusova bul máselege nege nazar aýdarǵanyn aityp ótti. Onyń pikirinshe, biýdjetten qomaqty qarajat bólingenimen, sol aqshanyń qaitymy azdaý.
