Parlament Májilisiniń jalpy otyrysynda depýtat Snejanna Imasheva áleýmettik turǵyn úige kezekti azaitýdyń qadamdaryn usyndy, dep habarlaidy QazAqparat.
«Qazirgi ýaqytta turǵyn úi kezeginde 540 myń azamat tur. Turǵyn úi qurylysynyń joǵary qarqynyna qaramastan, áleýmettik turǵyn úige kezek azaimaidy, al kei jerlerde tipti ósip keledi. Bul kezekte turǵan barlyq adamdardyń talaptary qashan tolyq oryndalatynyn eshkim aita almaidy. Máselen, Memleket basshysy
Q.K. Toqaevtyń tapsyrmasy boiynsha halyqtyń asa osal toptaryna turǵyn úi qaryzdaryn berý úshin 5-10-20 «Shańyraq» baǵdarlamasy iske qosyldy, onyń operatory «Otbasy bank» AQ bolyp sanalady.
Alaida, baǵdarlamanyń sharttary kópbalaly, jalǵyz basty
ata-analar, 1 jáne 2-toptaǵy múgedekter, jetim balalar siiaqty sanattarǵa qoljetimsiz. Kelip túsken 37 myń ótinimniń nebári 1500-i ǵana maquldanǵan», - dedi depýtat Úkimet basshysy Asqar Maminniń atyna joldaǵan saýalynda.
Osy oraida ol nyń sebepterine toqtaldy. Birinshiden, baǵdarlama boiynsha nesie alý úshin sońǵy 6 aidaǵy eńbek nemese kásipkerlik qyzmetten túsken otbasynyń kirisin rastaý qajet. Ádette, mundai talapty bankter klienttiń tólem qabilettiligin rastaý úshin qoiady. Alaida, azamattardyń osal sanattarynyń, kóbinese, járdemaqylar men zeinetaqylardan basqa, múldem eshqandai resmi kirisi joq. Bul rette olardyń kóbi turǵyn úi jaldap, ai saiyn jalǵa alý aqysyn tóleýge 50-100 myń teńge izdestirýge májbúr. Bul somany olar turǵyn úi qaryzyn óteýge jibere alar edi.
«Sonymen birge jaqsy kredittik tarih olardyń tólem qabilettiliginiń ólshemi bola alar edi. Óitkeni, kiristerin rastamai, olarǵa joǵary paiyzben taýarlyq kreditter men mikroqarjy uiymdarynyń kreditteri ǵana qoljetimdi bolady. Bul rette olar kredittik tarihyn búldirmeý úshin olardy ýaqytynda tóleidi. Kepilsiz jáne qymbat kreditterdi ýaqtyly qaitaratyn boryshkerler – tártipti, olardyń baǵdarlamaǵa qatysýy múmkin dep sanaimyn. Bul týraly jinalystarda sailaýshylar da: «Bizge memleketten baspana kerek emes, ony ipotekaǵa satyp alýǵa múmkindik berseńizder boldy!» dep suraǵan bolatyn», - dedi S. Imasheva.
Depýtat ekinshi sebepke toqtala kele, turǵyn úidi bastapqy naryqta ǵana satyp alýǵa bolatynyn, biraq jańa turǵyn úidiń baǵasy óte joǵary ekenin aitty. «Shańyraq» baǵdarlamasy boiynsha óńirlerde qaryzdyń eń joǵary somasy 12 million teńgeni quraidy. Bul baǵamen jańa salynǵa úiden 1-2 bólmeli páterdi ǵana satyp alýǵa bolady, biraq onyń ózi de joq. Óitkeni, mundai turǵyn úi qurylys salý kezeńinde satyp alynady. Jergilikti atqarýshy organnyń qarajaty esebinen salynatyn arzan turǵyn úi de jetkiliksiz.
«Qaitalama naryq suranysty ishinara qanaǵattandyrar edi. Baǵdarlamanyń maqsaty - áleýmettik turǵyn úi alýǵa kezekti qysqartý. Qurmetti Asqar Uzaqbaiuly, osy saýal arqyly Sizden halyqtyń áleýmettik jaǵynan osal sanatyndaǵy azamattarǵa turǵyn úi satyp alý úshin múmkindikterdi keńeitýdi jáne 5-10-20 «Shańyraq» baǵdarlamasynyń sharttaryn qaita qaraýdy suraimyn», - dedi S. Imasheva.
Osy oraida ol azamattardyń osal sanattaryna turǵyn úi qaryzdaryn kirisin rastamai, olardyń tólem qabilettiligin qosymsha parametrler boiynsha baǵalai otyryp alýǵa múmkindik berýdi, sondai-aq baǵdarlama boiynsha turǵyn úidi jyljymaityn múliktiń qaitalama naryǵynan satyp alý múmkindigin qamtamasyz etýdi surady.
