Májilis depýtaty Jambyl Ahmetbekov jergilikti jerlerdegi memlekettik qyzmetshilerdiń jumysyn synǵa aldy, dep habarlaidy Sputnik Qazaqstan.
Májilismen, "Halyq kommýnisteri" fraktsiiasynyń ókili Jambyl Ahmetbekov depýtattyq saýalyn eńbek jáne halyqty áleýmettik qorǵaý ministrliginiń basshysyna joldady. Aitýynsha, jýyrda fraktsiiadan járdem surap kelgen áieldiń basyndaǵy jaǵdai óńirlerdegi zeinetaqy taǵaiyndaý ortalyqtarynda ahýaldyń máz emes ekenin kórsetip otyr.
"Qaraǵandy oblysynyń Shet aýdanynan kelgen azamat ómir boiy "Qońyrat" sharýashylyǵynda, iaǵni sovhozynda eńbek etse de, zeinetke shyǵý kezinde eńbek ótilin dáleldei almai, eń tómengi 23 myń teńgemen zeinetke shyqqan. Sebebi, onyń derekteri arhivte bolmaǵan, eńbek kitapshasyndaǵy jazbalar da eskerilmegen. Sonda qalai, kezindegi sharýashylyqtyń salaq basshylarynyń kesirinen nelikten azamattar zardap shegýi tiis?!", - de ashyndy depýtat májilistiń jalpy otyrysynda.
Ahmetbekovtiń sózinshe, egde jastaǵy áielge zeinetaqy taǵaiyndaý barysynda qajetti zańdyq kómek kórsetilmegen.
"Shet aýdanynda osy sharýashylyqta eńbek etken qanshama azamat osylaisha zańdy tabysynan qaǵylyp otyr. Kezinde bul sovhozda keminde 500-1000, múmkin odan da kóp adam jumys istegenin eskersek, onyń saldaryn elestetýdiń ózi qiyn. Iaǵni, Qaraǵandy oblysynda osyndai jaǵdaiǵa tap kelgen qanshama azamat bar. Al búkil respýblikamyz boiynsha jaǵdai qandai degen oryndy suraq týyndaidy", - dep alańdady ol.
Osy tusta depýtat zeinetaqy tóleý ortalyqtarynda isteitin memlekettik qyzmetshilerdiń jumysyn synady.
"Álgi áieldiń sol jyldary sovhozda eńbek etkenin kórshileriniń bári biledi. Kóbisi sol jerde kúni búginge deiin turady. Kórshileriniń kýáligine júginý arqyly, ardagerler uiymdary arqyly, tipti qajet bolsa, sot sheshimi arqyly eńbek ótilin qalpyna keltirýdiń zańdy joldaryn aityp kómek jasamaǵan", - deidi Ahmetbekov.
Depýtattardyń pikirinshe, memlekettik qyzmetshiler halyqqa zeinetke shyǵýdyń zańdy joldaryn túsindirip otyrýy tiis. Al eńbek jáne halyqty áleýmettik qorǵaý ministrligi bul máseleni jiti nazarda ustaýy kerek. Sebebi, zeinetaqy taǵaiyndaý barysynda qazaqstandyqtar zańdy tabysynyń bir bóliginen qaǵylyp, konstitýtsiialyq quqyǵy taptalyp jatyr. Mundai jaǵdaiǵa, ásirese, quqyqtyq saýaty tómen, qarapaiym eńbek adamdary tap bolady.
"Osyndaida bir sheneýniktiń shalaǵai jumysy bir otbasynyń turmys-tirshiligine, iaǵni qoǵamdaǵy kóptegen otbasynyń kúnkórisine áser etedi. Sondyqtan qaraǵandylyq áieldiń zeinetaqysyn esepteý kezinde ketken qatelikterdi tez jóndeý úshin qyzmettik tekseris jasap, tiisti sheshim qabyldaýyńyzdy suraimyz. Ádildik ornaitynyna sengimiz keledi", - dedi Ahmetbekov.
