Densaýlyq saqtaý ministrligi de qaýipsiz jáne tiimdi vaktsinany kútip otyr. Bul týraly Ortalyq kommýnikatsiialar qyzmetinde ótken Qazaqstanda karantindik sharalardy kezeń-kezeńmen jeńildetý týraly onlain brifingide QR Bas memlekettik sanitarlyq dárigeri Aijan Esmaǵambetova aitty, dep habarlaidy QazAqparat.
«Búgingi tańda álemde koronavirýs infektsiiasyna qarsy 166 vaktsina jobasy jasaldy. Olardyń kópshiligi klinikaǵa deiingi testileý kezeńinde. Testileý erejesi bar - bul úsh kezeńnen ótý jáne mindetti túrde tirkeý. Koronavirýs infektsiiasyna qarsy 120 vaktsinanyń 17-si adamdarǵa synalyp jatyr. Eger biz Resei vaktsinasy týraly aitatyn bolsaq, onda ol klinikalyq synaqtyń 2 kezeńinen ótken, Resei Federatsiiasynda tirkelgen», - deidi QR Bas memlekettik sanitarlyq dárigeri Aijan Esmaǵambetova.
Onyń aitýynsha, Densaýlyq saqtaý ministrligi de sapaly vaktsinanyń shyǵýyn kútedi.
«Densaýlyq saqtaý ministrligi de qaýipsiz jáne tiimdi vaktsinany kútip otyr. Naryqqa qandai vaktsina alǵash paida bolǵanyna bailanysty biz de sol óndirýshilermen elge jetkizý boiynsha jumys isteitin bolamyz. Biz búkil álem vaktsinanyń shyǵarylýyn jáne óndirilýin kútip otyrǵanyn túsinýimiz kerek. Vaktsina shyqqan kezde kezek bolýy da zańdylyq. Vaktsinanyń álemge birdei mólsherde taralýyn qadaǵalaý úshin GAVI aliansy (vaktsinalar men immýndaý boiynsha jahandyq alians - red.) quryldy», - deidi ol.
Ol vaktsina egýde qandai adamdarǵa basymdyq beriletini týraly aitty.
«Búgingi kúni biz osy vaktsinatsiialaýǵa jatatyn toptarmen jumys istep jatyrmyz. Bizde qaýipti toptar boiynsha josparlar bar, olar úshin koronavirýs aýrýy óte qaýipti. Olar - 60-65 jastan asqan belgili bir sozylmaly aýrýlary bar adamdar. Sondai-aq, bul topqa meditsina qyzmetkerleri de jatady, óitkeni olar eń aldymen patsienttermen jáne koronavirýs juqpasynyń belgileri joq, biraq tasymaldaýshy bolyp sanalatyn adamdardy qarap, bailanysta bolady. Sondyqtan biz vaktsinatsiiaǵa daiyndyq, vaktsinany tańdaý jáne Densaýlyq saqtaý ministrliginde vaktsinatsiia strategiiamyzdy ázirleý boiynsha jumys júrgizýdemiz», - deidi QR Bas memlekettik sanitarlyq dárigeri.
