Densaýlyq saqtaý ministri Eljan Birtanov koronavirýs juqtyrdy, dep habarlaidy "Ult aqparat".
Ministr bul jaiynda óziniń Facebook paraqshasynda jazdy.
«Dostar, ózderińizge jaǵymsyz jańalyq jetkizýime týra kelip otyr. Koronavirýsqa tapsyrǵan sońǵy test nátijesi nashar shyqty, menen de aýrý anyqtaldy. Ókinishke qarai, mendegi simptomsyz forma emes, sondyqtan juqpaly aýrýlar aýrýhanasynda jatyrmyn. Sanitarlyq sharalardy qatań saqtaǵanyma qaramastan, bul indet meni de ainalyp ótpedi. Ásirese, qashyqtan, úide otyryp jumys istei almaityn qyzmetkerlerge qiyn. Sońǵy kúnderi birqatar óńirde, onyń ishinde kásipker, kásiporyn, meditsina mamandary, memlekettik, BAQ qyzmetkerleri arasynan indet juqtyrǵandar qatary artýda. Qazaqstandaǵy jahandyq daǵdarys pen pandemiia saldarynan paida bolǵan problemalardy sheshý úshin qazir kóptegen azamat qarqyndy jumys isteýde. Bizge jii jeke kezdesýlerge barýǵa, aimaqtarǵa issaparǵa shyǵýǵa týra keledi, mundai jaǵdaida, árine, COVID-19 juqtyrý qaýpi de joǵary» dep jazady Densaýlyq saqtaý ministri.
Eljan Birtanov barsha qazaqstandyqtardy «jeke karantin» erejelerin qatań saqtaýǵa shaqyrdy. Onyń aitýynsha, aýrýdyń aldyn alý sharalaryna muqiiat mán berý kerek.
1. Jumysta, kólikte, kóshede, dúkende jáne basqa jerlerde múmkindiginshe araqashyqtyqty saqtańyz;
2. Eger siz ofis qyzmetkeri bolsańyz, múmkindiginshe úiden jumys isteýge tyrysyńyz.
3.Týys, dostarmen onlain, video-qońyraý jáne ózge de jańa tehnologiialardyń kómegimen bailanys ornatyńyz;
4. Qoǵamdyq orynda maska kiip júrińiz;
5. Qoldy kem degende 20 sekýn sabynmen jii jýyp, sanitaizermen súrtińiz;
6. Ózińizdiń jáne otbasy músheleriniń temperatýrasyn jii ólshep turyńyz.
«Eger boiyńyzdan álsizdik, bas, tamaq aýrýy, dene qyzýynyń kóterilýi sekildi simptomdardy baiqasańyz, dereý dárigerge habarlasyńyz» dep eskertedi ministr.
