Marqum Denis Tenniń týysqandary men dostary oqiǵa kýágerlerin izdestirýdi qaita bastady, dep habarlaidy Sputnik Qazaqstan tilshisi.
Sochide ótken Olimpiada oiyndarynyń jeńimpazy Denis Tenniń týysqandary men dostary sportshyǵa arnalǵan Instagram jelisindegi resmi paraqshada habarlandyrý jariialady.
Olar 19 shilde kúni Qurmanǵazy men Báiseiitova kósheleriniń qiylysynda bolǵan qaiǵyly jaǵdaidyń kýágerlerin izdestirip jatyr.
"2018 jyly 19 shildede saǵat 14:50 kezinde Qurmanǵazy men Báiseiitova kósheleriniń qiylysynda kólikteri turǵan azamattar habar berýlerińizdi suraimyz. Denis Tendi óltirgen qylmyskerlerge qatysty tolyq aqparat jinaýǵa kómektesińizdershi. Bul rezonanstyq iste árbir detal mańyzdy. Birnárse baiqap qalǵan árbir adamnyń pikiri mańyzdy. Bul jerde mańyzdy emes degen dúnie joq! Árbir detaldyń óz róli bar. Avtotirkeýishtegi jazbalaryńyzdy qaita qarap shyǵýdy ótinip suraimyz. 2018 jyly 19 shildede kóligińizdiń qaida turǵanyn eske túsirińizdershi. Ótinip suraimyz. Kez kelgen senimdi aqparat úshin alǵys aitamyz! Eshkimniń esimi jariia etilmeitinine ýáde beremiz! Táýliktiń kez kelgen ýaqytynda +7 701 808 80 00 nómirine habarlasýlaryńyzǵa bolady", — delingen habarlama mátininde.
Bul habarlandyrýdy kóptegen qazaqstandyq júrgizýshi men akter ózderiniń jelidegi paraqshasynda bólisti. Denis Ten 2018 jyly 19 shildede pyshaq jaraqaty saldarynan kóz jumdy. Mánerlep syrǵanaýshy Denis Tenge ózi ustap alǵan urylar shabýyl jasady. Qaiǵyly jaǵdai Qurmanǵazy men Báiseiitova kósheleriniń qiylysynda saǵat 15 shamasynda boldy.
