Almatyda kólik tonaýshylar mánerlep syrǵanaýshy Denis Tendi pyshaqtap ketti, dep habarlaidy "Ult aqparat" Almaty IID baspasóz qyzmetine silteme jasap.
Oqiǵa búgin túski úshter shamasynda Qurmanǵazy men Baiseiitova kósheleriniń qiylysynda boldy.
"Denis Ten avtokóliginiń ainasyn urlamaqshy bolǵan eki belgisiz adamnyń ústinen túsken. Tóbeles shyǵyp, saldarynan Denis Ten pyshaq jaraqatyn aldy", — delingen habarlamada.
Atalǵan faktige qatysty tergeý júrip jatyr. Kúdiktilerdi anyqtaý jáne ustaý sharalary qolǵa alyndy. Almaty qalasy IID barlyq jeke quramy jumyldyrylǵan.
Denis Ten qazir aýyr hálde jansaqtaý bóliminde jatyr, ol kóp qan joǵaltqan.
"Beisenbi 19 shilde kúni saǵat 14.56-da jedel járdemge pyshaq jaraqatyn alǵany týraly habar tústi. Oqiǵa ornyna jedel meditsinalyq járdem brigadasy jiberildi", — de habarlady densaýlyq saqtaý basqarmasy.
Ten Ortalyq qalalyq klinikalyq aýrýhanaǵa jetkizilgen. Bastapqy diagnozy – oń jambastyń ústińgi bóliginen pyshaq jaraqatyn alǵan, tamyrlaryna zaqym kelgen, qan joǵaltqan.
"Aýrýhana túskende naýqastyń jaǵdaiy óte aýyr bolatyn, shuǵyl túrde jansaqtaý sharalary atqaryldy, barlyq tiisti bilikti mamandar naýqasty jedel emdeýge kiristi", — dep málimet berdi basqarmadaǵylar.
Denis Ten — qazaqstandyq mánerlep syrǵanaýshy, ol 2014 jyly Sochi Olimpiadasynda qola medal jeńip alǵan bolatyn.
