Almatyda 23 aqpannan bastap mánerlep syrǵanaýshy Denis Ten týraly «Denis Ten - Velichaishee shoý» atty derekti film kórsetile bastaidy, dep habarlaidy QazAqparat tilshisi.
Film Denistiń tórtinshi ári sońǵy «Denis jáne onyń dostary» atty muz aidynyndaǵy shoýyna daiyndyq týraly baiandaidy. Shara 2018 jyly 9 maýsymda elordadaǵy «Barys Arenada» ótkizilgen bolatyn.
«Bul Qazaqstandaǵy álemdik deńgeidegi tuńǵysh ári biregei muz aidynyndaǵy shoý. Shoýǵa qatysý úshin álemniń túkpir-túkpirinen juldyzdar kelgen edi. Denistiń basty maqsaty - Qazaqstanda mánerlep syrǵanaý sportyn damytý, bizdiń halyqqa álemdik deńgeidegi ónerdi kórsetip, olardy qanattandyrý boldy», - deidi Denis Ten atyndaǵy qordyń atqarýshy direktory Gaýhar Omar.
Onyń aitýyna qaraǵanda, Denis atalmysh jobasyna úlken daiyndyqpen kelip, uzaq ýaqyt boiy daiarlyq júrgizgen. Dostaryn ózi shaqyryp, olarǵa beriletin syilyqtardy da ózi daiyndaǵan.
«Shoýdyń aqtyq kezeńinde álemniń eń úzdik juldyzdary qazaqtyń ulttyq kiimderimen óner kórsetken edi. Mundai biregei shoý buryn-sońdy bizdiń elimizde bolmaǵan. Keremet shoý uiymdastyrylǵan edi», - deidi Gaýhar Omar.
«Denis Ten - velichaishee shoý» filminde Denistiń óziniń Nabýnari Oda, Elena Radionova, Karolina Kostner, Brýno Masso men Alena Savchenkodan alǵan suhbatyn kórýge bolady. Olar Qazaqstan týraly áserin baiandaidy. Filmniń epizodtarynda Denis úshin arnaiy án jazǵan qazaq ánshisi Dimash Qudaibergendi de kórýge bolady.
Sońǵy shoýdy ázirleýde Denispen birge jas rejisser, montajer ári operator Hanzat Keńes te jumys istegen. Al horeograf retinde kanadalyq mánerlep syrǵanaýshy She Linn-Býrn kómektesti. Túsirilim jumystary kanadalyq Toronto qalasynda da júrgizilgen.
Filmde sonymen birge Denis el úshin ózi uiymdastyrǵan shoýdyń qanshalyqty mańyzdy ekenin de aitady.
«Bul shoýdyń ózi qulap bara jatqan juldyz sekildi jarqyn ári keremet bolǵanyn qalaimyn», - deidi Denis filmde.
Aita keterligi, Denis Ten qorynyń uiymdastyrylýymen derekti film Almatydaǵy «Bekmambetov Cinema»-da 3 naýryz kúni kórsetiledi.
Eske salsaq, qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Almatydaǵy Qurmanǵazy men Baiseiitova kósheleriniń qiylysynda 19 shildede túski saǵat 15:00-der shamasynda bolǵan.
