Almaty politsiia departamenti bastyǵynyń orynbasary Rýstam Ábdirahmanov Aiajan Edilovanyń ólimine qatysty mán-jaidy baiandady. Politsiianyń aqparatyna sáikes, marqum tanysý saity arqyly beitanys adammen 16 naýryzda tanysqan.
"20 naýryzda 102 nómirine Edilova Aiajannyń iz-tússiz joǵalyp ketý faktisi boiynsha habarlama tústi. 20 naýryz saǵat 16:06-da qońyraý shaldy. Sol sátte atalǵan fakt tergep-tekserýdiń biryńǵai tizilimine tirkeldi. Sotqa deiingi tergeý bastaldy. 21 naýryzda arnaiy tergeý toby qurylyp, Edilova Aiajandy izdeý jumystaryna kiristi. 21 naýryzda saǵat 22:00-de Nurkent shaǵyn aýdanynda kúdikti turatyn páter mekenjaiy anyqtaldy", - dedi politsiia.
Ol jerge barǵan kezde politsiia úidiń esigin buzyp kirdi. Tártip saqshylaryn kórgen kúdikti ózine qol salmaq boldy. Jedel járdem shaqyrylyp, aýrýhanaǵa jetkizildi.
Politsiianyń sózinshe, kúdikti qyzdy 19 naýryzdan 20 naýryzǵa qaraǵan túni óltirgenin aitqan. Oqiǵa túngi saǵat on eki - bir shamasynda boldy. Bul ýaqytta onyń iz-tússiz joǵalyp ketkeni politsiiaǵa habarlanbaǵan.
Qyzdyń denesi bólshektengen kúii tabyldy. Kúdikti máiitti jasyrý maqsatynda bólshektengen deneniń bir bóligin ózi turatyn Alataý aýdanynan basqa aýdanǵa aparyp, qoqys jáshigine tastaǵan. Bul da 19-nan 20 naýryzǵa qaraǵan túni bolǵan. Qoqys jáshigine tastalǵan dene bólshekteri tabyldy, saraptama taǵaiyndaldy.
"Joǵalǵany týraly aqparat túskennen keiin jábirlenýshiniń kimmen bailanysta bolǵany anyqtaldy. Ol kúdiktimen áleýmettik jelide 16 naýryzda tanysqan. Jedel izdestirý sharalary barysynda onyń mekenjaiy anyqtaldy. Ókinishke qarai, kúdikti ustalǵan sátke deiin qylmys jasap úlgergen", - dedi Ábdirahmanov.
Qazir kúdikti er adam aýrýhanada qamaýǵa alyndy. Ota jasalyp, palataǵa shyǵaryldy. Sottyń sheshimimen qamaýǵa alyný týraly bultartpaý sharasy taǵaiyndaldy. Meditsinalyq mekemeden shyǵarylǵan soń ýaqytsha ustaý izoliatoryna qamalady.
Almaty qalalyq Politsiia departamentiniń resmi ókili Saltanat Ázirbektiń sózinshe, kúdikti jasyrynǵan páterden de qaitys bolǵan stýdent qyzdyń denesiniń bólshekteri tabylǵan.
«Kúdiktini ustaý kezinde ol óz-ózine qol jumsamaq bolyp denesin jaraqattaǵan. Biraq onyń bul áreketi iske aspady. Oqiǵa ornyna dárigerler shaqyrtylyp, ustalǵan adam №7-shi aýrýhanaǵa jetkizildi. Ony táýlik boiy kúzetedi. Aiyqqannan keiin kúdikti tergeý izoliatoryna aýystyrylady. Kúdiktiniń aitýynsha, Aiajan ekeýiniń arasynda janjal týyp, sosyn ol ony óltirip, qylmystyń izderin jasyrýǵa tyrysqan. Osy maqsatty kúdikti qyzdyń denesin bólshektegen. Dene bólshekterin qalanyń ár jerine laqtyryp úlgergen. Sot oǵan qatysty qamaýǵa alý túrindegi sharany qabyldady. Tergeý júrip jatyr»,- dedi Saltanat Ázirbek.
Kúdikti er adam buryn sottalmaǵan. 1993 jyly týǵan Túrkistan oblysynyń týmasy. Beinebaqylaý kameralarynan qyzdyń óz erkimen úige kirgeni anyqtaldy. Politsiianyń aitýynsha, qyz mekenjaiǵa ózi kelip, páterge ózi kirgen. Al kúdiktiniń qandai tásilmen ony úiine shaqyrǵany tergeý barysynda belgili bolady.
Aita keteiik, 22 naýryzda qyzdyń joǵalǵany týraly habarlandyrý áleýmettik jelilerde paida boldy. Týystarynyń aitýynsha, 2001 jyly týǵan Edilova Aiajan 19 naýryz kúni saǵat 20:43-te Qonaev kóshesi 43 úi mekenjaiy boiynsha jumystan shyǵyp ketken jáne úige oralmaǵan. Baqylaý kamerasy qyzdy sońǵy ret jumystan shyqqan kezde túsirgen.
Sol kúni qyzdyń denesi tabylǵany habarlandy. Qylmystyq kodekstiń 99-baby ekinshi bóligi "Adam óltirý" boiynsha qylmystyq is qozǵaldy.
