AQSh kongresi Ókilder palatasynyń spikeri demokrat Nensi Pelosi prezident Donald Tramptyń Iranǵa qarsy áskeri is-qimyl bastaý jónindegi ókiletin shekteý týraly rezoliýtsiia jobasyn osy aptada daýysqa salatynyn málimdedi.
Pelosidiń málimdeýinshe, jobada Aq úi ákimshiligi Kongrestiń maquldaýynan ótpegen Iranǵa qarsy kez kelgen áskeri áreketti jaqyn 30 kún ishinde toqtatýy tiis degen talap bar.
Dál osyndai rezoliýtsiia jobasyn AQSh senatyna demokrat Tim Kein de usyndy. Buǵan uqsas basqa da rezoliýtsiia jobalary bar. Mysaly, kelesi AQSh prezidenti sailaýyna demokrattar kandidaty bolýǵa úmitker senator Berni Sanders Iranǵa qarsy Kongress áli maquldamaǵan kez kelgen áskeri is-áreketti qarjylandyrýdy toqtata turýdy usynady.
Mundai rezoliýtsiia jobalary Iran generaly Kasem Súleimanige qarsy AQSh áskeri operatsiiasynan keiin usynylyp otyr. "Quds kúshteriniń" qolbasshysy general Súleimani 3 qańtarda Baǵdat áýejaiynda AQSh-tyń áýe shabýylynan qaza tapqan. Demokrattardyń kópshiligi prezident Tramptyń Súleimanige qarsy operatsiia bastaý týraly sheshimin synady. Olar Kongreske bul operatsiia jaily eshkim aldyn ala habarlamaǵanyn aitady. Tramptyń qarsylasy, burynǵy vitse-prezident Djo Baiden Súleimanidyń taǵdyryna qynjylmaitynyn, biraq bul oqiǵa Taiaý Shyǵystaǵy jaǵdaidy odan saiyn shielenistirip, AQSh-qa nuqsan keltiretindikten generaldy óltirýdi aiyptaitynyn málimdedi. Demokratiialyq partiianyń sol qanatyndaǵy jetekshilerdiń biri, Kongress múshesi Aleksandra Okazio-Kortes prezident Tramptyń "eger Iran Súleimani úshin kek alatyn bolsa, Iran nysandaryna soqqy beriletini" týraly aitqan sózin "áskeri qylmys" dep atady.
Aq úi ákimshiligi jáne respýblikashyldardyń kóbi Tramptyń sheshimin quptaidy. AQSh memlekettik hatshysy Maik Pompeo 5 qańtarda Súleimanidyń kózin joiý týraly sheshim qabyldaýǵa negiz bolǵan barlaý qorytyndysy "rastalǵanyn" málimdedi. Ol áreketsiz otyrý eleýli qaýipke soqtyrýy múmkin edi degen. Memlekettik hatshynyń sózinshe, Irannyń islam saqshylary korpýsynyń arnaiy elitalyq bólimi – "Quds kúshteriniń" qolbasshysy general Kasem Súleimani amerikalyq nysandarǵa qarsy operatsiialar josparlaǵan.
Tramptyń is-áreketin AQSh-tyń Iraktaǵy qarýly kúshteriniń burynǵy qolbasshysy jáne Ortalyq barlaý basqarmasynyń burynǵy direktory general Devid Petreýs te qoldady. Onyń pikirinshe, AQSh-qa general Kasem Súleimani jaqynda kózi joiylǵan "Islam memleketi" terrorlyq tobynyń jetekshisi Ábý Bákir ál-Baǵdadiden, tipti Ýsama ben Ladennen de qaýipti dushpan bolǵan.
"Amerika daýysy" basylymy prezident Tramptyń ókiletin shekteitin rezoliýtsiia jobasyn demokrattar kóp daýysqa ie bolyp otyrǵan Ókilder palatasy maquldaýy múmkin, alaida respýblikashyldar basym senattyń ony qabyldaýy neǵaibil degen boljam aitady.
6 qańtarda Tegeranda myńdaǵan adam general Kasem Súleimanimen qoshtasý úshin qala kóshelerine shyqty. Olar "Amerikaǵa ólim kelsin" dep aiǵailady.
