Dúniejúzi qazaqtary qaýymdastyǵynyń tóraǵasy – Elbasy Nursultan Nazarbaev shette júrgen qandastar taǵdyrynan bir sátte qol úzbei, tikelei aralasýynyń negizinde baýyrlarymyzdyń týǵan jerine qonys aýdarý legi jalǵasýda. Osyǵan bailanysty «Otandastar qory» KEAQ-nyń pilottyq jobasy aiasynda Mońǵoliianyń Qobda, Baian-Ólgei aimaqtarynan Qazaqstandaǵy týystaryna qosylyp, urpaqtaryn atamekenge jetkizý maqsatynda Pavlodar oblysyna kóp balaly 13 otbasynyń 80 adamy kóshirildi. Bul týraly "Ult aqparat" Qordyń baspasóz qyzmetine silteme jasap habarlaidy.
Aita keterligi, Qazaqstanǵa birjolata kóship kelýge niet bildirgen qandastarymyz negizinen áleýmettik, turmystyq jaǵdaiyna bailanysty ózdiginen kóship kele almaityn edi. Sondyqtan, bul igi is «Otandastar qory» KEAQ–nyń demeýshileriniń (M.Dairbekov, A. Mashkevich, S. Seitjanov, B.Ótemuratov, Q. Satybaldy, A. Muqibek jáne basqalar) tikelei qoldaýymen Dúniejúzi qazaqtary qaýymdastyǵy Pavlodar oblystyq filialynyń uiymdastyrýymen iske asyryldy.
«Kóship kelgen qandastar arasynda 13 balany ómirge ákelip ósirip, jetkizgen ardaqty ana Qaisha apamyz óziniń qolyndaǵy kenje uly men kelininiń 6 balasymen birge atamekenge kelip otyr. Sondai-aq, jasóspirim oqý jasyndaǵy 46 bala, 4 stýdent, 1 zeinetker, eńbek jasyndaǵy 29 azamat kóship keldi. Olardyń ishinde aǵylshyn tili, bastaýysh synyp muǵalimderi, tehnika mamandary, mehanizator, mal dárigeri, meditsina salasynyń mamany, basqada arnaiy oqý ortalyqtaryn bitirgen tájirbieli mamandyq ieleri bar», - delingen baspasóz baianynda.
Mońǵoliiadan kóship kelýshi otbasylar múshelerin jáne otbasynyń turmysqa qajetti qoldanystaǵy múlik, jeke úi júkterin Resei Federatsiiasynyń Altai ólkesiniń Tashanta keden beketi arqyly shekaradan alyp ótýine bailanysty keleńsiz jaǵdailardy boldyrmaý úshin «Otandastar qory» RF Omby qalasyndaǵy Qazaqstan Respýblikasy Konsýly qyzmetkerleriniń kómegine júgingen bolatyn. Osyndai birlesken sharalardyń nátijesinde qandastarymyz aman esen elge jetkizilip otyr.
Kóship kelýshiler Pavlodar qalasyndaǵy «Konystanýshylarmen oralmandardy ýaqytsha beiimdeý ortalyǵynda» bir apta bolyp, Pavlodar qalasynyń tarihi oryndary murajailarymen tanysyp, birqatar quqyqtyq aqyl keńes alyp, qujattaryn rásimdep, meditsinalyq tekserýden ótedi. Odan keiin, Ekibastuz qalasynyń, akedemik Álikei Marǵulan atyndaǵy aýylyna 9 otbasy, Pavlodar aýdanyna 2 otbasy, Aqsý qalasynyń Dostyq, Aqjol aýyldaryna 2 otbasy, qalǵandary Terenkól, Mai aýdandaryna qonystanady dep josparlanýda.
Kóship kelgen otbasylary túgeldei biylǵy jylǵy oralmandardyń óńirlik kvotasyna kirip, memleket tarapynan ár adamǵa 88 375 teńge, bir jyl boiy úi jaldap turatyn qarajat beriledi. Balalary oqý oryndaryna, eńbek jasyndaǵylar jumysqa ornalasady.
