Elimizdiń Bas memlekettik sanitar dárigeri Aijan Esmaǵambetova demalys kúnderi shekteý sharalaryn alý máselesine orai pikir bildirdi, dep habarlaidy "Ult aqparat".
«Demalys kúnderi shekteý sharalaryn alyp tastaý týraly másele ázirge qarastyrylmaidy. Bizde demalys kúnderi onsyz da azdaǵan ǵana shekteý qalyp otyr. Adamdar kóp jinalatyn saýda, oiyn-saýyq ortalyqtarynyń, jabyq bazarlardyń, fitnes-ortalyqtardyń, spa-ortalyqtardyń jáne sulýlyq salondarynyń jumysyna ǵana shekteý bar. Bul óte tómengi talap sanalady. Bizdiń mindetimiz – epidemiologiialyq ahýal turaqtylyǵyn saqtaý jáne aýrýdyń odan ary tómendeýine qol jetkizý», - dedi Aijan Esmaǵambetova.
Aita keteiik, búgin elordadaǵy №6 qalalyq emhanada maýsymdyq tumaýǵa qarsy ekpe saldyrǵan QR Densaýlyq saqtaý ministri Aleksei Tsoimen birge elimizdiń Bas memlekettik sanitar dárigeri Aijan Esmaǵambetova da kelgen bolatyn.
Ol BAQ ókilderine suhbat berý barysynda 20 qyrkúiekten keiin karantin sharalary qatańdatylady degen qaýesetke jaýap bergen edi.
«Maýsym-shilde aiyndaǵy aýrýǵa shaldyǵýmen qaraǵanda búginde eldegi epidemiologiialyq ahýaldyń turaqty ekendigin aita alamyz. Memlekettik organdardyń aqparatyn, iaǵni, resmi aqparattardy ǵana paidalanyńyzdar. Jiyn ótip, talqylaýdan keiin qyrkúiekte karantin engizedi dep júrgenderge aitarym, mundai resmi aqparat joq. Barlyǵy da epidemiologiialyq ahýalǵa bailanysty», - dedi Esmaǵambetova.
