Demalys kúnderi Qazaqstannyń kóptegen oblystarynda qar jaýyp, burqasyn bolady, respýblikanyń ońtústik jáne ońtústik-shyǵysynda jaýyn-shashyn, jańbyr, jańbyr aralas qar túsip, dúisenbi kúni kei jerlerde boran bolady, dep habarlaidy "Ult aqparat" Qazgidrometke silteme jasap.
Sinoptikterdiń málimetinshe, aýa raiynyń salqyndaýy Qazaqstanǵa Batys Sibirden jyljyp kele jatqan salqyn aǵyndarǵa bailanysty. Olar ózimen birge arktikalyq ylǵaldy aýany ákelip, respýblikanyń barlyq derlik aýmaǵynda kún salqyndaýyna sebep bolady.
Bul kúnderi aýanyń temperatýrasy klimattyq normadan 2...5 gradýs, al ortalyq jáne shyǵys oblystarda - 5...10 gradýs tómen bolady.
