Almaty qalasy taýarlar men qyzmetterdiń sapasy men qaýipsizdigin baqylaý departamentiniń bas mamany Gúlnara Mádimarova onlain brifing barysynda demalys kúnderi engizilgen karantin sharalarynyń erejelerin túsindirdi, dep habarlaidy QazAqparat.
Onyń aitýynsha, demalys kúnderi karantin sharalaryn qadaǵalaityn monitoringilik top jumys isteidi.
«Demalys kúnderi turǵyndarǵa syrtqa shyǵýǵa ruqsat etiledi, saiabaqtarǵa, alańdarǵa, jaǵalaýǵa barýǵa bolady, biraq mindetti túrde maska taǵý qajet. Serýendeýge shyqqandardyń sany úsh adamnan aspaýy tiis. Sonymen qatar, áleýmettik qashyqtyqty saqtaý mańyzdy. Demalys kúnderi qoǵamdyq kóliktiń qozǵalysyna, 65 jastan asqan adamdardyń kóshege shyǵýyna, saýda, oiyn-saýyq ortalyqtary (ondaǵy azyq-túlik sýpermarketteri men dárihanalardy qospaǵanda), saýda úileriniń, saýda jelileriniń jumysyna, sulýlyq salondary, shashtarazdar, SPA-ortalyqtary, kosmetologiialyq qyzmet kórsetetin nysandardyń jumysyna tyiym salynady», – dedi Gúlnara Mádimarova.
Sonymen qatar, ol karantindik sharalardy saqtamaǵandar jaýapqa tartylatynyn atap ótti.
«Túngi klýbtar, kompiýterlik mekemeler, biliard, túngi barlardyń jumysyna tyiym salynǵan. Eger olardyń jumys istegeni anyqtalsa, mekeme ielerine QR Ákimshilik quqyq buzýshylyq týraly kodeksiniń 425-babynyń 1-bóligi boiynsha aiyppul salynady», - dep eskertti spiker.
